पेट्रोलियम अन्वेषण तथा उत्खनन : अघि बढ्न सकेन दोस्रो चरणको काम
सुर्खेत, १६ माघ । चिनियाँ टोली नफर्किंदा दैलेखमा पेट्रोलियम पदार्थको अन्वेषण तथा उत्खननको दोस्रो चरणको काम अझै अघि बढ्न सकेको छैन । गतवर्ष गरिएको सेस्मिक सर्भेपछिको दोस्रो चरणको काम दशैं–तिहारलगत्तै शुरू गरिने भनिए पनि अझै शुरू हुन सकेको छैन ।
चिनियाँ प्राविधिक टोलीको नतिजाका आधारमा दोस्रो चरणको सर्भे र ड्रिलिङको काम हुने भनिएको थियो । तर कोरोना महामारीको कारण देखाउँदै चिनियाँ विज्ञ र प्राविधिकको टोली नआएको खानी तथा भूगर्भ विभागले बताएको छ । विभागका अनुसार सन् २०१९ फेबु्रअरीमा चिनियाँ टोलीसँग गरिएको सम्झौताको म्याद सकिन लागेको छ । चिनियाँ टोलीसँग गरिएको तीन चरणको सम्झौता अनुसारको पहिलो स्थलगत अध्ययनको कामको नतिजा नै समयमै उपलब्ध नहुँदा काम अघि बढाउन अन्योल भएको छ ।
नेपाल र चीन सरकारबीच पेट्रोलियम पदार्थ अन्वेषणका लागि सन् २०१७ मा पहिलोपल्ट सम्झौता गरिएको थियो । यस्तै २०२२ सम्ममा सबै काम सक्ने गरी आयोजनासँग चिनियाँ टोलीले सम्झौता गरेको खानी तथा भूगर्भ विभागका अन्वेषण अधिकृत गणेशनाथ त्रिपाठीले बताए । उनका अनुसार अहिलेसम्म सेस्मिक सर्भेको रिपोर्ट समेत आएको छैन ।
कोरोना महामारीका कारण चिनियाँ टोली आउन ढिलाइ भएको त्रिपाठीको भनाइ छ । ‘विज्ञहरू हाम्रो नियमित सम्पर्कमा छन्,’ उनले भने, ‘अहिले चीन सरकारसँग नेपाल आउन अनुमति माग गरेको बुझिएको छ, उनीहरू आएपछि थप चरणका काम शुरू हुनेछन् ।’
