शेयरबजार पूँजीकरणमा बैंक, वित्त तथा बीमा कम्पनीको हिस्सा ७२ प्रतिशत

काठमाडौं, १६ चैत । शेयरबजार पूँजीकरणमा बैंक तथा वित्तीय संस्था र बीमा कम्पनीको हिस्सा ७२.१ प्रतिशत रहेको छ । नेपाल राष्ट्र बैंकका अनुसार चालू आर्थिक वर्षको ७ महिना अवधिमा सूचीकृत कम्पनीहरूमध्ये उक्त कम्पनीहरूको पूँजीकरण सबैभन्दा धेरै रहेको हो । त्यसैगरी जलविद्युत् कम्पनीको हिस्सा ६.२ प्रतिशत, उत्पादन तथा प्रशोधन उद्योगको हिस्सा ४.१ प्रतिशत, होटेलको हिस्सा ०.८ प्रतिशत, व्यापारिक संस्थाको हिस्सा ०.५ प्रतिशत तथा अन्य समूहका कम्पनीहरुको हिस्सा १६.२ प्रतिशत रहेको छ ।

२०७७ माघ मसान्तसम्ममा नेपाल स्टक एक्सचेन्ज लिमिटेडमा सूचीकृत कम्पनीहरूको संख्या २१६ रहेको छ । सूचीकृत कम्पनीहरूमध्ये १४५ बैंक तथा वित्तीय संस्था र बीमा कम्पनी रहेका छन् भने ३७ जलविद्युत् कम्पनी, १९ उत्पादन तथा प्रशोधन उद्योग, ४÷४ होटल तथा व्यापारिक संस्था र ७ अन्य समूहका रहेका छन् । २०७७ असारमा सूचीकृत कम्पनीहरूको संख्या २१२ रहेको थियो ।

नेपाल स्टक एक्सचेन्ज लिमिटेडमा २०७७ माघसम्ममा सूचीकृत ५ अर्ब ४० करोड शेयरको चुक्ता मूल्य रु. ५३० अर्ब ६२ करोड रहेको छ । आर्थिक वर्ष २०७७÷७८ को सात महिनामा १ खर्ब ५० अर्ब बराबरको विकास ऋणपत्र, ३५ अर्ब ३७ करोड बराबरको साधारण शेयर, १३ अर्ब ७१ करोड बराबरको बोनस शेयर, ७ अर्ब बराबरको डिबेन्चर २ अर्ब ७१ करोड बराबरको हकप्रद शेयर र ६५ करोड बराबरको म्युचुअल फण्ड गरी कुल २ खर्ब ९ अर्ब ४४ करोड बराबरको थप धितोपत्र सूचीकृत भएका छन् ।