विकास निर्माणको काम सुस्त, नौ महिनामा बिनियोजित बजेटको एक चौथाई मात्र खर्च

काठमाडौं, ११ चैत । चालु आर्थिक वर्षमा पनि विकास निर्माणका लागि छुट्याइएको बजेट सन्तोषजनक रुपमा खर्च हुन सकेको छैन । सरकारले चालु आर्थिक वर्षका लागि ३ खर्व ३५ अर्व १७ करोड रुपैयाँ बजेट विनियोजन गरेकोमा चैत ९ गते सम्मको अवधीमा ९९ अर्व ५२ करोड रुपैयाँ मात्र खर्च भएको छ । महालेखा नियन्त्रकको कार्यालयका अनुसार यो रकम कुल बजेटको २९.६९ प्रतिशत हो ।

चालु आर्थिक वर्षको बजेटको अर्धबार्षिक समिक्षा गर्दै अर्थ मन्त्रालयले यो वर्ष २ खर्व ३४ अर्व रुपैयाँ विकास बजेट खर्च गर्ने लक्ष्य लिएको छ । यो वर्ष स्थानीय, प्रदेश र केन्द्र गरि तीन तहको निर्वाचन सम्पन्न भयो । जसको कारण पनि विकास निर्माणको बजेट सन्तोषजनक रुपमा हुन नसकेको अर्थविद् केशव आचार्यको विश्लेषण छ । ‘यो वर्ष मुलुक निर्वाचनमय बन्यो राजनीतिक दल, प्रशासन र जनता सबै निर्वाचनमा होमिए जसले गर्दा विकास निर्माणको कामले गति लिन सकेन, उनले भने तर अव भने हामी सबैको ध्यान विकास निर्माणमा जान जरुरी छ । कामको गतिलाई बढाउन आवश्यक छ ।’
मुलुक नयाँ स्वरुपमा गएसँगै जनतामा समेत विकासको चाहना बढेकाले नयाँ नेतृत्वले विकासको आकांक्षालाई सम्बोधन गर्नुपर्ने आचार्यको भनाई छ ।

सरकारले मुख्य प्राथमिकतामा राखेर बजेट बिनियोजन गरेको राष्ट्रिय गौरवको आयोजनामा पनि खर्च ज्यादै न्यून छ। राष्ट्रिय गौरवका आयोजनालाई यस वर्ष ६३ अर्व ७० करोड ५४ लाख रुपैयाँ बजेट बिनियोजन गरिएकोमा ६ महिनाको अवधीमा १२ अर्व ५ करोड ३५ लाख रुपैयाँ मात्र खर्च भएको छ ।

Leave a Reply

Your email address will not be published. Required fields are marked *