एक वर्षमा दर्ता भए २७७ उद्योग, मझौला उद्योग सबैभन्दा बढी
काठमाडौं, ३१ असार । गत आर्थिक वर्षमा मुलुकमा २७७ उद्योग दर्ता भएको पाइएको छ । उद्योग विभागको औद्योगिक तथ्यांकले यस्तो देखाएको हो । दर्ता भएका उद्योगमध्ये मझौला प्रकृतिका उद्योगको संख्या सबैभन्दा धेरै छ ।
विभागको तथ्यांक अनुसार सो अवधिमा मझौला उद्योगको दर्ता संख्या १२३ रहेको छ । यस्तै ठूला उद्योग र साना उद्योग क्रमशः ५८ र ९६ वटा दर्ता भएका छन् ।
दर्ता भएका उक्त संख्याका उद्योगको कुल प्रस्तावित पूँजी १ खर्ब ५२ अर्ब ६२ करोड रुपैयाँ रहेको छ भने प्रस्तावित स्थिर पूँजी १ खर्ब ४० अर्ब ३९ करोड रुपैयाँ रहेको छ । तीनवटै किसिमका उक्त उद्योग स्थापना हुँदा कुल १७ हजार ३८८ जनाले रोजगारी पाउने उल्लेख छ ।
गत आर्थिक वर्षसम्ममा मुलुकमा दर्ता भएका कुल उद्योगको संख्या भने ८ हजार २४७ रहेको छ । यसमध्ये साना उद्योगको संख्या सबैभन्दा धेरै ५ हजार २१९ रहेको छ । यस्तै मझौला उद्योग १ हजार ८५६ र ठूला उद्योग १ हजार १७२ रहेका छन् ।
