काठमाडौं, १० साउन । निर्यातको तुलनामा आयात दशौं गुणा बढी हुँदा मुलुकको व्यापार घाटा वर्षेनि बढ्दै गए पनि केही वस्तुको निकासीले भने उत्साह थपेको देखिन्छ । गत आर्थिक वर्ष २०७७÷७८ मा आयात तथा निर्यात दुवै उच्च परिमाणले बढेको छ । यद्यपि निर्यातमा देखिएको वृद्धिले पनि आशा ठाउँ समेत दिएको हो । यसरी नेपालको निर्यातलाई उकास्ने मुख्य वस्तुमा भने भटमासको प्रशोधित तेल रहेको छ ।
एक वर्षमा अवधिमा नेपालबाट भटमासको प्रशोधित तेल मात्रै ५३ अर्ब ६५ करोड रुपैयाँभन्दा बढीको निर्यात भएको छ । भन्सार विभागले सार्वजनिक गरेको गत आर्थिक वर्षको तथ्यांकले मुलुकबाट कुल ५३ अर्ब ६५ करोड १५ लाख ९८ हजार रुपैयाँ बराबरको भटमासको तेल निकासी भएको देखाएको छ । सो अवधिमा कुल २९ करोड ८० लाख ४३ हजार केजीभन्दा बढी भटमासको तेल निर्यात भएको हो ।
अघिल्लो आवको तुलनामा गत आवमा भटमासको प्रशोधित तेल निर्यात ४२२.७४ प्रतिशतले बढेको देखिएको छ । अघिल्लो आवमा १२ अर्ब ६९ करोड ११ लाख २० हजार रुपैयाँ बराबरको ९ करोड ४१ लाख ८३ हजार केजी भटमासको तेल निकासी भएको भन्सार विभागको तथ्यांक छ ।
Leave a Reply