विकास बैंकहरूलाई पूँजीको जोहो गर्न हकप्रद शेयर जारी गर्न दिनुपर्ने माग
काठमाडौं, १४ भदौ । डेभलपमेन्ट बैंकर्सले विकास बैंकहरुलाई हकप्रद शेयर जारी गन अनुमति दिनुपर्ने माग गरेका छन् । नेपाल राष्ट्र बैंकलाई चालू आर्थिक वर्ष २०७८–०७९ को मौद्रिक नीति मार्फत उक्त व्यवस्था गर्न माग गरेपनि त्यसलाई सम्बोधन नगरिएको भन्दै गुनासो पोखेका छन् ।
नेपाल डेभलपमेन्ट बैंकर्स एसोसिएसनका पूर्वअध्यक्ष गोविन्द ढकालले विकास बैंकहरुको व्यवसाय विस्तारका लागि आवश्यक पूँजीको जोहो गर्न हकप्रद शेयर जारी गर्न पाउनुपर्ने भन्दै राष्ट्र बैंकले यसलाई सम्बोधन गर्नुपर्ने बताए । बोनस शेयर, सञ्चित मुनाफा र डिबेञ्चरबाट मात्र व्यवसाय विस्तारका लागि पूँजी पर्याप्त नहुने उनको तर्क छ ।
मर्जर एवम् प्राप्तीले विकास बैंकहरुको संख्या उल्लेख्य रुपमा घटेकाले अव हकप्रद मार्फत पूँजी बढाएर व्यवसाय विस्तार गर्न दिनुपर्ने पूर्वअध्यक्ष ढकालले बताए ।
हाल नेपालमा विकास बैंकको संख्या १८ वटा छ । २०७६ असारमसान्तसम्म विकास बैंकको संख्या २९ थियो ।
