बुधबार शेयर बजारमा सामान्य सुधार, कारोबार १० अर्बभन्दा कम
काठमाडौं, १६ भदौ । शेयर बजारमा झिनो सुधार देखिएको छ । साताको दुई काराबोर दिन नै निरन्तर ओरालो लागेको शेयर बजार बुधबार १.१८ अंकले सुधार भएको छ। नेप्से परिसूचक बढेर २९७७.०२ विन्दुमा आइपुगेको छ ।
आइतबार ४९ र मंगलबार नेप्से परिसूचक ६९.०५ अंकले घटेको थियो ।
बुधबार कारोबारमा आएका मध्ये बैंकिङ, होटल एवम् पर्यटन, जीवन बीमा र इन्भेष्टमेन्ट समूहको उपसूचक बढेपनि अरु सबै घटेको छ। शेयर कारोबार पनि २२६ कम्पनीको ९ अर्ब ३५ करोड रुपैयाँको भएको छ। परिसूचक बढेपनि कारोबार रकम मंगलबारको तुलनमा कम हो । मंगलबार १३ अर्ब भन्दा बढीको कारोबार भएको थियो ।
बुधबार सबैभन्दा धेरै कमाउँनेमा रुरु हाइड्रोपावरका लगानीकर्ता छ। यो कम्पनीको शेयर मूल्य सबैभन्दा धेरै ७.५५ प्रतिशतले बढेको छ । यस्तै गुमाउँनेमा भने सन्राइज फष्ट म्यूचुअल फन्ड छ । यसको शेयर मूल्यमा ९.९८ प्रतिशतको गिरावट आएको छ। सबैभन्दा धेरै शेयर कारोबार भने अरुण भ्याली हाइड्रोपावरको भएको छ। यो कम्पनीको बुधबार ५९ करोड ९९ लाख रुपैयाँको कारोबार भएको छ।
