अतिप्रभावित पर्यटन व्यवसायलाई कर्जा भुक्तानीको म्याद थपियो, टीआर कर्जाको अवधि घट्यो

काठमाडौं, २५ भदौ । नेपाल राष्ट्र बैंकले कोभिडबाट अतिप्रभावित पर्यटन क्षेत्रका व्यवसायीले लिएको कर्जा भुक्तानीको म्याद थप गरेको छ । केन्द्रीय बैंकले क, ख र ग वर्गका बैंक तथा वित्तीय संस्थालाई बिहीवार निर्देशिका जारी गर्दै कोरोना अतिप्रभावित पर्यटन व्यवसायीले २०७९ असारसम्ममा भुक्तानी गर्नुपर्ने कर्जाको दायित्वलाई दुई वर्षसम्ममा चार किस्तामा असुल गर्नेगरी छुट्टै हिसाब मिलाउन निर्देशन दिएको छ ।

होटल, ट्राभल, ट्रेकिङ र हवाई सेवाजस्ता बाह्य पर्यटकमा निर्भर रहनुपर्ने व्यवसायीलाई परेको कोभिड–१९ को असर मूल्यांकन गरी २०७९ असार मसान्तसम्ममा भुक्तान गर्नुपर्ने साँवा तथा ब्याज दायित्वलाई छुट्टै हिसाब राखेर २ वर्षसम्ममा कम्तीमा चार किस्तामा असुली गर्ने व्यवस्था मिलाउन राष्ट्र बैंकले निर्देशन दिएको हो ।

यसैगरी राष्ट्र बैंकले ट्रस्ट रिसिप्ट (टीआर) कर्जा, बिल्स डिस्काउन्टिङ वा त्यस्तै प्रकृतिका आयात कर्जा प्रदान गर्दा अधिकतम ९० दिनको अवधिका लागि मात्र प्रवाह गर्न पाइने व्यवस्था गरिएको छ । यसअघि यस्तो कर्जाको सीमा १८० दिन थियो ।
साथै राष्ट्र बैंकले नेपालमा कुनै पनि प्रकारका क्रिप्टोकरेन्सीको कारोबार, प्रयोग तथा माइनिङ गैरकानूनी रहेको ठहर गर्दै क्रिप्टोकरेन्सीको कारोबार, प्रयोग तथा माइनिङ नगर्न तथा नगराउन निर्देशन दिएको छ । क्रिप्टोकरेन्सीको कारोबार, प्रयोग तथा माइनिङ जस्ता कार्यमा संलग्न हुन प्रोत्साहन गर्ने÷गराउने गरेको पाइएमा प्रचलित कानून बमोजिम कारबाही हुने चेतावनी समेत केन्द्रीय बैंकले दिएको छ ।

Leave a Reply

Your email address will not be published. Required fields are marked *