तरलता सन्तुलित राख्न आज पुनः ३० अर्बको रिपो जारी गर्दै राष्ट्र बैंक
काठमाडौं, ७ असोज । बैंकिङ प्रणालीमा चर्किंदै गएको तरलता अभाव सन्तुलनमा राख्न नेपाल राष्ट्र बैंकले आज (बिहीवार) पुनः ३० अर्बको रिपो जारी गर्ने भएको छ । मौद्रिक तरलता व्यवस्थापनको अल्पकालीन उपकरणको रूपमा बैंकले रिपो जारी गर्ने गर्छ ।
केन्द्रीय बैंक सार्वजनिक ऋण व्यवस्थापन विभागले सातदिने अवधिको उक्त परिमाणको रिपोको विक्री बोलकबोलमार्फत गर्न लागेको हो । सम्बन्धित बैंक तथा वित्तीय संस्थाले आफूले लिन चाहेकको रकम र ब्याजसहित उल्लेख गरी आज दिउँसो ३ बजेसम्म अनलाइनमार्फत बोल लगाउन सक्नेछन् । उक्त रिपो असोज १४ गते परिपक्व हुनेछ ।
राष्ट्र बैंकले यसअघि गत बिहीवार २० अर्ब रुपैयाँको रिपो जारी गरेको थियो । यस्तै विगत ३ साताको अवधिमा केन्द्रीय बैंकले ७० अर्ब रुपैयाँ बराबरको रिपो विक्री गरिसकेको छ ।
पछिल्ला दिनहरूमा बैंक तथा वित्तीय संस्थामा लगानीयोग्य रकमको खडेरी पर्न थालेपछि निक्षेप र कर्जा दुवैतर्फ ब्याज बढ्न थालेको छ । निकै लामो समयसम्म एकल अंकमा रहेको निक्षेपको ब्याज समेत पछिल्लो समय केही बैंकहरूले दोहोरो अंकमा पु¥याएका छन् ।
