दसैँ नजिकिएसँगै बजारमा चहलपहल बढ्न थाल्यो, उपभोक्ता आकर्षित गर्न विभिन्न कम्पनीका छुट अफर
काठमाडौं, ११ असोज । दसैँ नजिकिएसँगै बजारमा चहलपहल बढ्न थालेको छ । दसैँकै अवसर पारेर रेमिट्यान्स सेवा प्रदायक कम्पनी, अटो विक्रेता र खाद्य सामग्री विक्रेताहरूले विभिन्न अफर र सहुलियत सार्वजनिक गर्न थालेका छन् । दसैँलाई लक्षित गरेर आइएमई रेमिटले ‘डबलको डबलको डबल अफर’ सार्वजनिक गरेको छ । यो योजनाअन्तर्गत आइएमईमार्फत विदेशबाट रकम पठाउँदा ८ गुणासम्म रकम प्राप्त सकिने आइएमई ग्रुपका प्रमुख कार्यकारी अधिकृत सुमन पोखरेलले जानकारी दिए ।
त्यसैगरी बजारमा अटो विक्रेताहरुले पनि धमाधम दसैँ अफर सार्वजनिक गर्न थालेका छन् । विभिन्न कम्पनीहरुले नगद छुट, एक्सचेञ्ज, स्क्र्याच कार्ड डिस्काउन्ड, एक वर्षको बीमा लगायतका योजना सार्वजनिक गरेका छन् ।
दसैँलाई लक्षित गरी व्यवसायीहरुले लत्ता कपडा, जुत्ताचप्पल र दैनिक उपभोग्य सामग्रीमा समेत छुट दिएका छन् । सरकारले समेत सहुलियत पसल नै सञ्चालन गरी उपभोक्तालाई दैनिक उपभोग्य वस्तुमा छुट उपलब्ध गराउँदै आएको छ ।
दसैँ तथा तिहारका बेला व्यापारीहरुले खाद्य वस्तुका साथै लत्ता कपडा तथा अन्य उपभोग्य वस्तुमा बढी मूल्य लिन सक्ने भएकाले सरकारले बजार अनुगमनलाई पनि तिब्रता दिएको छ । चार्डपर्वका बेला बजारमा अखाद्य सामग्रीको विक्रीवितरण गर्ने व्यापारीलाई वाणिज्य, आपूर्ति तथा उपभोक्ता संरक्षण विभागले कानुनी कारबाही समेत गर्ने गरिने महानिर्देशक प्रकाश पौडेलले जानकारी दिए ।
विभागले गरेको नियमित अनुगमनमा खाद्य सामग्री विक्रेताहरुले म्याद नाघेका सामग्री बढी बेच्ने गरेको भेटिएकाले उपभोक्ता आफै सचेत भएर सामान खरिद गर्न पनि आग्रह गरेको छ ।
