बैंकिङ प्रणालीमा तरलता अभाव कायमै, आज थप १० अर्बको रिपो जारी गर्दै राष्ट्र बैंक
काठमाडौं, ४ कात्तिक । बैंकिङ प्रणालीमा तरलता अभाव भएपछि बैंकहरूले निक्षेपमा बढाएको ब्याजदरमा राष्ट्र बैंकले अंकुश लगाइदिएको छ । निक्षेपमा ब्याजदर बढाइएकै अवस्थामा समेत बैंक तथा वित्तीय संस्थालाई लगानीयोग्य रकमको अभाव भइरहेका बेला मंगलवार केन्द्रीय बैंकले जारी गरेको निर्देशन बैंकहरू समस्यामा पर्ने देखिएका छन् ।
यस्तोमा तरलता व्यवस्थामा केही सहज बनाउन राष्ट्र बैंकले आज (कात्तिक ४ गते) थप १० अर्ब बराबरको सातदिने अवधिको रिपो जारी गर्ने भएको छ । बैंकले आगामी कात्तिक ११ गते परिपक्व हुने रु १० अर्ब बराबरको रिपो बोलकबोल माध्यमबाट बैंकिङ प्रणालीमा प्रवाह गर्न लागेको छ । बोलकबोलमा इजाजतप्राप्त क, ख र ग वर्गका बैंक वित्तीय संस्थाले भाग लिन पाउनेछन् ।
निक्षेप बढाउन र आफ्नो निक्षेप बाहिर जान नदिन बैंक तथा वित्तीय संस्थाले चालु आर्थिक वर्षको दोस्रो त्रैमासिकको सुरुआतमै दुई अंकको ब्याजदर कायम गरेका थिए । त्यसरी बैंक तथा वित्तीय संस्थाले आफूखुसी ब्याजदर असाधारणरूपमा बढाएको भन्दै ब्याजदर व्यवस्थित गर्न राष्ट्र बैंकले मंगलवार तीनबुँदे निर्देशन जारी गरेको थियो ।
बैंकिङ प्रणालीमा तरलता असहज हुँदा राष्ट्र बैंकले लगातार रिपोमार्फत प्रणालीमा तरलता प्रवाह गर्दै आएको छ । गत असोज २० गते बैंकले २० अर्ब बराबरको १४ दिन अवधिको रिपो जारी गरेको थियो । तरलता अभाव समस्याको व्यवस्थापन गर्न बैंक तथा वित्तीय संस्थाले रिपो, अन्तर बैंक सापटी, अस्थायी तरलता सुविधाजस्ता उपकरणको प्रयोग गर्ने गर्दछन् । बैंक तथा वित्तीय संस्थाले यस्ता उपकरणको निरन्तर प्रयोग गरिरहे पनि तरलता व्यवस्थापन सहज हुन सकेको छैन ।
