१०२ मेगावाट मध्यभोटेकोशीको काम ७५ प्रतिशत, २०७९ पुसभित्र सम्पन्न गर्ने लक्ष्य

काठमाडौं, १५ कात्तिक । सिन्धुपाल्चोकको भोटेकोशी गाउँपालिकाको चाकुमा निर्माणाधीन १०२ मेगावाटको मध्यभोटेकोशी जलविद्युत् आयोजनाको काम ७५ प्रतिशत सकिएको छ । विद्युत्गृह भवन निर्माण आगामी पुसभित्र र सुरुङ तीन महिनाभित्र सक्ने लक्ष्य राखिएको छ । ७ दशमलव २ किलोमिटर सुरुङमध्ये ४ सय १५ मिटर सुरुङ खन्न बाँकी रहेको आयोजनाले बताएको छ ।

उक्त आयोजनाको काम १ वर्षभित्र सक्न नेपाल विद्युत् प्राधिकरणका कार्यकारी निर्देशक कुलमान घिसिङले निर्देशन दिएका छन् । सोही अनुसार आगामी २०७९ पुसभित्र निर्माण सम्पन्न गरिसक्ने लक्ष्य राखिएको छ । कार्यकारी निर्देशक घिसिङले निर्माणस्थलको निरीक्षण गरी निर्माण प्रगतिको जानकारी लिदै समयसीमा भित्र आयोजना सम्पन्न गर्न निर्देशन दिएका हुन् ।

प्राकृतिक प्रकोपको चपेटामा परेर करिब बन्द अवस्थामा पुगिसकेको आयोजनाको मूख्य सुरुङको बाहेक अन्य संरचनाहरुको निर्माण प्रगति उत्साहजनक देखिएको घिसिङले बताएका छन् । आयोजना प्रभावित तथा मुलुकभरका नेपाली नागरिकले ऋण काढेर भए पनि सेयर खरिद गरी आयोजनामा लगानी गरेका कारण समयसीमा भित्रै आयोजना सम्पन्न गर्नुपर्नेमा उनले जोड दिएका छन् ।

घिसिङसहितको टोलीले आयोजना व्यवस्थापन, ठेकेदार कम्पनीहरु र परामर्शदातासँग छलफल गरी २०७९ को पुसभित्र कुनै पनि अवस्थामा निर्माण सम्पन्न हुने गरी एकीकृत तालिका बनाएर काम गर्न निर्देशन दिएको छ ।

आयोजनाको लागत बढ्न नदिन सिभिल तथा हाइड्रोमेकानिकलको काम इन्जिनियरिङ, खरिद र निर्माण (इपीसी) मोडेलमा चिनियाँ कम्पनी क्वाङ्सीले ठेक्का लिएको थियो । इलेक्ट्रो मेकानिकलतर्फको काम भने एन्ड्रिजले गरिरहेको छ । एन्ड्रिजले उपकरणहरु आयोजना स्थलमा ल्याइसकेको छ । आयोजनाको अनुमानित लागत कर्मचारी सञ्चयकोषसँग ऋण सम्झौता हुँदा निर्माण अवधिको ब्याजबाहेक १२ अर्ब २८ करोड ३३ लाख रुपैयाँ थियो । आयोजनाको अद्यावधिक अनुमानित लागत निर्माण अवधिको ब्याजबाहेक १५ अर्ब ३ करोड २ लाख ९० रुपैयाँ छ ।

Leave a Reply

Your email address will not be published. Required fields are marked *