त्रिभुवन अन्तर्राष्ट्रिय विमानस्थल २१ घण्टा संचालन, हवाई चाप कम हुने अपेक्षा

काठमाडौं, ७ जेठ । अन्तर्राष्ट्रिय उडान भर्ने मुलुककै एक मात्र विमानस्थल त्रिभुवन अन्तर्राष्ट्रिय विमानस्थल आज देखि दैनिक २१ घण्टा सञ्चालनमा ल्याइएको छ । त्रिभुवन अन्तर्राष्ट्रिय बिमानस्थल कार्यालयका अनुसार आज देखि बिहान ६ बजे देखि भोलीपल्ट बिहान ३ बजे सम्म बिमानस्थल संचालन हुने छ । संस्कृति पर्यटन तथा नागरिक उड्डयन मन्त्री रबिन्द्र अधिकारीले विमान स्थलको चापलाई कम गर्न भन्दै संचालन अवधी बढाउने निर्णय गरेका थिए ।

विमानस्थलका महाप्रबन्धक राजकुमार क्षेत्रीले थपिएको समयको लागि एअर ट्राफिक कण्ट्रोल लगायत आवश्यक जनशक्ति व्यवस्थापन भइसकेको अर्थको अर्थलाई जानकारी दिए । बढेको समयअनुसार आन्तरिक तथा अन्तरराष्ट्रिय उडानहरूलाई समय तालिका निर्धारण गरिने उनले बताए ।

यसअघि बिहान ६ बजे देखि राति १२ बजे सम्म १८ घण्टा बिमानस्थल संचालन हुने गरेको थियो । केही अन्तर्राष्ट्रिय विमान कम्पनीहरुले थपिएको समयावधीमा उडान भर्ने बताएको र हवाई चाप केही कम हुने उनको विश्वास छ । यस्तै आगामी दिनमा सो समयमा उडान भर्ने कम्पनीहरुलाई छुटको समेत व्यवस्था गर्ने महाप्रबन्धक क्षेत्रीले बताए ।

यसैबीच, नेपाल नागरिक उड्डयन प्राधिकरणको बोर्ड बैठकले कर्मचारीहरूले उठाएका मागका सम्बन्धमा आवश्यक निर्णय पनि गरेको छ । कर्मचारीहरूले अपरेशनमा काम गर्दा अतिरिक्त समयको अतिरिक्त भत्ता, रात्रिकालीन ड्युटिपछि घर जान सवारीसाधनको व्यवस्था तथा अन्य सुरक्षासम्बन्धी विषयमा प्राधिकरणसँग माग गरेका थिए ।

Leave a Reply

Your email address will not be published. Required fields are marked *