माैद्रक नीतिः बैंकदर यथावत, निक्षेप संकलन बोलकबोल दर ४.५ प्रतिशतमा झर्याे
काठमाडाैं, ७ साउन । नेपाल राष्ट्र बैंकले बैंकदरलाई यथावत नै राखेकाे छ । आर्थिक वर्ष २०८०÷८१ को मौद्रिक नीति सार्वजनिक गर्दै राष्ट्र बैंकले बैंकदरलाई ७.५ प्रतिशतमा यथावत राखेकाे र निक्षेप संकलन बोलकबोल दरलाई ५.५ प्रतिशतबाट घटाएर ४.५ प्रतिशत कायम गरिएको जानकारी दिएकाे हाे ।
आन्तरिक तथा बाह्य आर्थिक परिदृश्यलाई दृष्टिगत गरी नीतिगत दरलाई भने ५० आधार विन्दुले घटाई ६.५ प्रतिशत कायम गरिएको छ ।
बैंक दरमा स्थायी तरलता सुविधा र नीतिगत दरमा ओभरनाइट तरलता सुविधा उपलब्ध हुने व्यवस्थालाई यथावत राखेको राष्ट्र बैंकले जनाएको छ ।
सञ्चालन लक्ष्यको रुपमा लिएको भारित औसत अन्तरबैंक ब्याजदर बैंक दरभन्दा उच्च र निक्षेप संकलन दरभन्दा न्यून भएमा दोस्रो बजार कारोबार र निक्षेप संकलन बोलकबोल खुला गरिने राष्ट्र बैंकले जनाएको छ ।