मानव आवत–जावतका लागि ८ वर्षपछि खुला हुँदै नेपाल–चीन तातोपानी नाका
काठमाडौं, १ भदौ । झण्डै ८ वर्षदेखि बन्द रहेको नेपाल–चीन तातोपानी नाकामा आजदेखि मानव आवत–जावत सुरु हुने भएको छ। सामान पैठारी तथा निकासीका लागि केही महिना अगाडि नै नाका खुले पनि मानव आवत–जावत भने खुलेको थिएन।
गत मंगलबार तिब्बतको ल्हासामा चिनियाँ अधिकारी र नेपाली अधिकारीबीच भएको बैठकले नाकामा स्थानीय सर्वसाधारण आवतजावत गर्न पाउने निर्णय गरेको सिन्धुपाल्चोकका प्रमुख जिल्ला अधिकारी रमेश न्यौपानेले जानकारी दिए।
प्रजिअ न्यौपानेले नाकामा मानव आवत–जावत खुला गर्ने विषयमा सबै तयारी गरिएको बताए। ‘नेपालतर्फबाट गरिने सम्पूर्ण तयारी गरेका छौँ,’ न्यौपानेले भने।
२०७२ सालको भूकम्पपछि तातोपानी नाका बन्द रहेको थियो। तातोपानी नाकाबाट ३ महिना अगाडि मात्रै मालवाहक सवारीको आवतजावत खुलेको थियो।
