वैदेशिक अध्ययन शीर्षकमा एक वर्षमा एक अर्ब ४२ करोड बाहिरियो
काठमाडौं, १५ भदौ । नेपला राष्ट्र बैंकको तथ्यांक अनुसार गत वर्ष पाँच वर्ष यताकै बढी रकम शिक्षा मार्फत नेपाली विद्यार्थीले विदेश अध्ययनका लागि लगेका छन् । गत वर्ष १ खर्ब ४२ करोड रुपैयाँ नेपाली विद्यार्थीले विदेश अध्ययनका लागि नेपालबाट बाहिर लगेका हुन् । जुन अघिल्लो वर्षको तुलनामा ४८.३३ प्रतिशतले बढी हो । अघिल्लो वर्ष भने नेपालबाट ६७ अर्ब ७० करोड रुपैयाँ बाहिरिएको थियो ।
राष्ट्र बैंकको तथ्याङ्क अनुसार मासिक औसतमा ८ अर्ब ३६ करोड भन्दा बढी विदेशी मुद्रा नेपालबाट बाहिरिएको देखिन्छ । गत वर्ष २०७९ को साउनमा ७ अर्ब १३ करोड, भदौमा ५ अर्ब ६३ करोड, असोजमा ५ अर्ब १३ करोड र कात्तिकमा ४ अर्ब ७२ करोड रुपैयाँ नेपाली विद्यार्थीले विदेश अध्ययनका लागि लगेका थिए ।
मङ्सिर, पुस र माघमा क्रमशः ६ अर्ब २० करोड, ६ अर्ब ५५ करोड र ८ अर्ब ३८ करोड रुपैयाँ बाहिरिएको थियो । त्यसपछिका महिनामा भने वृद्धि भएको देखिन्छ । राष्ट्र बैङ्कका अनुसार फागुनमा १० अर्ब ९६ करोड र चैतमा १२ अर्ब ४९ करोड रुपैयाँ बाहिरिएको थियो । त्यसपछिको महिना अर्थात् गत वैशाखमा घटेर ७ अर्ब ९५ करोड रुपैयाँ नेपाली विद्यार्थीले नेपालबाट विदेश पढ्नका लागि लगेका थिए । गत जेठमा भने गत आवकै सबैभन्दा धेरै अर्थात् १४ अर्ब ४ करोड रुपैयाँ बाहिरिएको थियो । गत असारमा भने ११ अर्ब २४ करोड रुपैयाँ बाहिरिएको थियो ।
कोरोना महामारीपछि विदेश पढ्न जानको संख्या बढ्न थालेको हो । गत वर्ष मात्रै १ लाख १० हजार २१९ जना विद्यार्थीहरूले एनओसी लिएका छन् । शिक्षा मन्त्रालयको तथ्याङ्क अनुसार अघिल्लो वर्षको तुलनामा केही सङ्ख्या घटेको छ । तर, विदेश अध्ययन मोह कम भने देखिँदैन । विशेषगरि कक्षा १२ र स्नातक पढेर विदेश पढ्न जाने विद्यार्थीहरूको सङ्ख्या निकै बाक्लो रहेको छ ।
हाल नेपाली विद्यार्थीहरू अमेरिका, अष्ट्रेलिया, जापान, क्यानडा, जर्मनी, न्युजील्याण्ड लगायत विश्वका धेरै मुलुकहरूमा अध्ययनका लागि जाने गरेका छन् । विशेषगरि गरी यी मुलुक नै नेपाली विद्यार्थीको रोजाइमा पर्ने गरेको देखिन्छ । पढाइका साथै राम्रो कमाई हुने भएपछि नेपाली विद्यार्थी विदेशिने गरेका हुन् ।
