गैरआवासीय नेपालीले नेपालमा शेयर कारोबार गर्न पाउने, आईपीओ १०० रुपैयाँमा नै आउँदै
काठमाडौं, २१ भदौ । नेपाल धितोपत्र बोर्डले नियमावली संशोधन गरी गैरआवासीय नेपालीलाई पनि धितोपत्र दोस्रो बजारमा कारोबार खुला गरेको छ । तर, गैरआवासीय नेपालीले ‘एनआरए नेपाल डेभलपमेन्ट फण्ड’ को आईपीओ मार्फत दोस्रो बजारमा प्रवेश गर्नुपर्ने छ ।
साढे दुई वर्षअघि स्थापन भएको यो कम्पनीले अब आईपीओ निष्कासन प्रक्रिया थालेको छ । ‘धितोपत्र दर्ता तथा निष्कासन नियमावली, २०८०’ सातौं संशोधन गरी गैरआवासीय नेपालीले आईपीओ खरिद गर्न पाउने व्यवस्था गरिएको हो ।
यो व्यवस्था भएसँगै अब ८५ वटा देशमा भएका गैरआवासीय नेपालीले ‘एनआरए नेपाल डेभलपमेन्ट फण्ड’ को १०० रुपैयाँमै आईपीओ खरिद गर्न सक्ने फण्डका प्रमुख कार्याकारी अधिकारी (सीईओ) अनलराज भट्टराईले बताए । “नियमावली संशोधन गरेर एनआरएनहरूलाई दोस्रो बजारमा आउने बाटो खुला भएको छ । ‘एनआरए नेपाल डेभलपमेन्ट फण्ड’मार्फत ८५ देशमा भएका एनआरएनहरूले अब फस भ्याल्लुमै आईपीओ खरिद गर्न सक्नु हुने छ,” उनले भने, “यो शेयर नेपाल स्टक एक्चेन्जमा कारोबार हुन्छ । तर, यो सेयर गैर आवासीय नेपालीहरूबीच मात्र कारोबार हुनेछ ।”
अब ‘एनआरए नेपाल डेभलपमेन्ट फण्ड’ आईपीओको प्रक्रियामा अगाडि बढ्ने भट्टराईले बताए ।
नेपालमा पूर्वाधार, उत्पादनशिल लगायतका क्षेत्रमा लगानी गर्ने गरी १० अर्ब रुपैयाँको पूँजी भएको ‘एनआरएन नेपाल डेभलपमेन्ट फण्ड’ को घोषणा भएको छ ।
एनआरएन नेपाल डेभलपमेन्ट फण्डमा गैरआवासीय नेपालीको ९ अर्ब ५० करोड रुपैयाँ र नेपाल सरकारको ५० करोड रुपैयाँ शेयर लगानी हुनेछ । यो फण्ड २०७७ चैत ३० गते एनआरएन नेपाल डेभलपमेन्ट फण्ड लिमिटेडको नाममा कम्पनी रजिष्ट्रार कार्यालयमा दर्ता भएको छ ।
