विश्व बैंकले नेपालका लागि १५० मिलियन डलरको वित्तपोषण उपलब्ध गराउने
काठमाडाैं, २३ असाेज । विश्व बैंकले नेपालका लागि १५० मिलियन डलर बराबरको वित्तपोषण उपलब्ध गराउने भएको छ ।विश्व बैंकको कार्यकारी सञ्चालक समितिले नेपालमा प्राकृतिक वा जलवायु प्रेरित खतरा वा स्वास्थ्य आपतकालिन अवस्थामा प्रयोग गर्न नेपाल सरकारलाई आकस्मिक वित्तपोषण स्वीकृत गरेकाे हाे ।
नेपालमा प्राकृतिक प्रकोपहरूको सामना गर्नका लागि विश्व बैंकले ‘क्याटास्ट्रोफी डिफर्ड ड्रडाउन अप्शन’ शुरू गरेको छ । यस कार्यक्रमले प्रकोप प्रतिकार्यका लागि नीति र नियम सुधारलाई समर्थन गर्दै प्रकोपको प्रभावलाई कम गर्ने उद्देश्यले संस्थागत संयन्त्रलाई सुदृढ बनाउँछ ।
यस कार्यक्रमले सरकारले पूर्व–जानकारी प्रणालीहरू सुधार गर्न र महत्वपूर्ण पूर्वाधारमा जोखिम कम गर्नका लागि आवश्यक नीति, संस्थाहरू र नियमहरूको निर्माणमा मद्दत गर्दछ । यसले सार्वजनिक स्वास्थ्य आपतकालीन अवस्थामा तयारीलाई पनि वृद्धि गर्छ ।
क्याट डीडीओ द्वारा प्रदान गरिने सर्तगत वित्तपोषणले प्रकोप पछि तात्कालिक तरलताको पहुँच प्रदान गर्छ । सरकारलाई प्रकोपको प्रतिकार्य र पुनःस्थापनाको लागि थप उपकरण उपलब्ध गराउँछ । नेपालमा प्रकोपपश्चातको स्रोतहरू तीन तहको संघीय प्रणालीमा प्रकोपको प्रतिकार्य र पुनःस्थापना गर्नका लागि महत्वपूर्ण छन् ।
विश्व बैंकका क्षेत्रीय निर्देशक डेविड सिस्लेनले हालको बाढीले देखाएको जस्तै, नेपाल प्राकृतिक र जलवायु–प्रेरित खतराहरू र स्वास्थ्य आपतकालीन अवस्थाहरूको बहुपरिघटनाको सामना गर्दै गएको बताइ । यसले देशलाई गम्भीर आर्थिक झट्का भोग्ने जोखिममा पार्दै गएको उनको भनाई छ ।
विश्व बैंको क्याट डीडीओ कार्यक्रमले ती जोखिमहरूको विरुद्ध लचीलापन निर्माण गर्न सरकारका सुधारहरूको समर्थन गर्ने र प्रकोप वा सार्वजनिक स्वास्थ्य आपतकालीन अवस्थाबाहेक तत्काल पहुँच योग्य क्रेडिटको लाइन प्रदान गर्दछ जसले तात्कालिक र प्रभावकारी प्रतिकार्य सुनिश्चित गर्ने बताए ।
