सेयर बजारबाट कात्तिकमा उठ्याे ७५ करोड ८७ लाख ८१ हजार रुपैयाँ पुँजीगत लाभकर
काठमाडौं, ६ मंसिर । चालु आर्थिक वर्ष २०८१/८२ को कात्तिक महिनामा शेयर कारोबारबाट ७५ करोड ८७ लाख ८१ हजार रुपैयाँ पुँजीगत लाभकर उठेको छ ।
शेयर कारोबारमा भएको नाफाबाट लगानीकर्ताले सरकारलाई सो बराबरको पुँजीगत लाभकर तिरेका हुन । सिडिएस एन्ड क्लियरिङ लिमिटेडबाट प्राप्त कात्तिक महिनाको तथ्यांकले यस्तो देखाएको हो ।
कात्तिकमा व्यक्तिगततर्फ दीर्घकालिन कारोबारबाट २६ करोड २३ लाख ८७ हजार रुपियाँ र अल्पकालिन कारोबारबाट ४१ करोड ७४ लाख ५४ हजार रुपियाँ यस्तो कर उठेको छ ।
यसैगरि संस्थागत शेयर कारोबार अन्तरगत सात करोड ८७ लाख २० हजार रुपियाँ र स्टक डिलरले गर्ने कारोबारबाट दुई लाख १९ हजार रुपियाँ कर उठेको तथ्यांकमा उल्लेख छ ।
चालु आवको पहिलो चार महिनामा भने आठ अर्ब १६ करोड २६ लाख रुपियाँ यस्तो पुँजीगत लाभकर उठेको छ । तथ्यांकअनुसार गत साउनमा चार अर्ब २३ करोड ७८ लाख रुपियाँ पुँजीगत लाभकर उठेको थियो । यसैगरि भदौमा दुई अर्ब ५७ करोड ९४ लाख ८० हजार रुपियाँ, असोजमा ५८ करोड ६५ लाख ४० हजार रुपियाँ र कात्तिकमा ७५ करोड ८७ लाख ८१ हजार रुपियाँ पुँजीगत लाभकर उठेको सिडीएससीको तथ्यांकमा उल्लेख छ ।
