नेपाल बैंक लिमिटेडको अध्यक्षमा थान प्रसाद पंज्ञानी नियुक्त
काठमाडाैं, १३ फागुन । नेपाल बैंक लिमिटेडको अध्यक्षमा थान प्रसाद पंज्ञानी नियुक्त भएका छन् । कम्पनी सञ्चालक समितिको फागुन ९ गते बसेको बैठकले उनलाई अध्यक्ष पदमा चयन गरेको हो ।
नवनियुक्त अध्यक्ष पंज्ञानीले नेपाल राष्ट्र बैंकका गभर्नर महाप्रसाद अधिकारीबाट फागुन १२ गते पद तथा गोपनीयताको शपथ ग्रहण गरेका छन् । बैंकले विज्ञप्ति जारी गर्दै पंज्ञानीको नेतृत्वमा बैंक अझ मजबुत बन्ने विश्वास व्यक्त गरेको छ ।
पंज्ञानी अर्थमन्त्रालयको प्रतिनिधित्व गर्दै गत भदौ २७ गते नेपाल बैंकको सञ्चालक समितिमा नियुक्त भएका थिए । हाल उनी अर्थमन्त्रालयको प्रशासन विभागमा सहसचिवको रूपमा कार्यरत छन् ।
