६ महिनामा औद्योगिक उत्पादन क्षेत्रतर्फ ८.४ प्रतिशत र निर्माण क्षेत्रतर्फ ७.७ प्रतिशतले कर्जा विस्तार
काठमाडाैं, १५ फागुन ।आर्थिक वर्ष २०८०/८१ मा ३.६ प्रतिशत रहेको मुलुककाे आर्थिक वृद्धि चालु आर्थिक वर्षको पहिलो त्रैमासमा ३.४ प्रतिशत रहेको अनुमान राष्ट्रिय तथ्याङ्क कार्यालयले गरेकाे छ ।
चालु आर्थिक वर्षको पुस मसान्तसम्म धान उत्पादन ४.०४ प्रतिशतले बढेको अनुमान छ । चालु आर्थिक वर्षको तेस्रो र चौथो त्रयमासमा पूर्वाधार विकास लगायतका सार्वजनिक एवम्निजी निर्माणले थप गति लिएमा विगत २ वर्षदेखि संकुचनमा रहेका निर्माण र उत्पादनमूलक उद्योगजस्ता कुल गार्हस्थ्य उत्पादनका उपक्षेत्रमा सुधार आउने अनुमान छ ।
आर्थिक वर्ष २०८१÷८२ को ६ महिनासम्मको कर्जा प्रवाह विश्लेषण गर्दासमेत आर्थिक गतिविधि विस्तारको क्रममा रहेको अनुमान छ । चालु आर्थिक वर्षको ६ महिनासम्ममा बैंक तथा वित्तीय संस्थाहरुबाट औद्योगिक उत्पादन क्षेत्रतर्फ ८.४ प्रतिशत (रु.६८ अर्ब ४१ करोड), उपभोग्य क्षेत्रतर्फ ५.८ प्रतिशत (रु.५८ अर्ब ४० करोड), थोक तथा खुद्रा व्यापार क्षेत्रतर्फ ४.८ प्रतिशत (रु.४८ अर्ब ३४ करोड) र निर्माण क्षेत्रतर्फ ७.७ प्रतिशत (रु.१५ अर्ब ९४ करोड) ले कर्जा विस्तार भएको छ ।
विगत २ वर्षदेखि ऋणात्मक वृद्धि रहेको उत्पादनमूलक उद्योग र निर्माण क्षेत्रले अझै गति लिन सकेको छैन । यद्यपि, जलविद्युत उत्पादनमा हुँदै गएको वृद्धि, वैदेशिक व्यापारमा भएको विस्तार र पर्यटन क्षेत्रमा देखिएको सुधारले आर्थिक क्रियाकलाप विस्तारमा सहयोग पुग्ने जनाइएकाे छ ।
यसका साथैनिजी क्षेत्रको लगानी अभिवृद्धिका लागि नेपाल सरकारले हालै गरेका कानुनी सुधारहरुको कार्यान्वयनबाट लगानीको वातावरणमा सुधार आउने नेपाल राष्ट्र बैंककाे विश्वास छ ।
