निजी क्षेत्रतर्फ कर्जा प्रवाहमा उछाल, डिजिटल कारोबार र निष्क्रिय कर्जामा चुनौती बढी

काठमाडाैं, १६ फागुन । चालु आर्थिक वर्ष २०८१/८२ को पहिलो ६ महिनामा बैंक तथा वित्तीय संस्थाहरूबाट निजी क्षेत्रतर्फ २ खर्ब ६५ अर्ब ५६ करोड रुपैयाँ थप कर्जा प्रवाह भएको छ । नेपाल राष्ट्र बैंकले जारी गरेको अर्धवार्षिक मौद्रिक नीति समीक्षा अनुसार, यो रकम अघिल्लो वर्षको सोही अवधिको तुलनामा ७.० प्रतिशतले बढी रहेको छ ।

अघिल्लो वर्ष यसै अवधिमा १ खर्ब ९२ अर्ब ६४ करोड रुपैयाँ कर्जा प्रवाह भएको थियो । बैंक तथा वित्तीय संस्थाहरूको निक्षेप पनि वार्षिक बिन्दुगत आधारमा ९.९ प्रतिशतले बढेको छ, जबकि अघिल्लो वर्ष यो दर १४.९ प्रतिशत रहेको थियो । ब्याजदरमा ढलान आएको छ, जसमा वाणिज्य बैंकहरूको आधार दर ६.६५ प्रतिशत र कर्जाको भारित औसत ब्याजदर ८.६९ प्रतिशतमा सीमित भएको छ । बैंकिङ क्षेत्रमा निष्क्रिय कर्जा अनुपात ४.९२ प्रतिशत पुगेको छ, जुन अघिल्लो वर्ष ३.७३ प्रतिशत थियो ।

यसैगरी, डिजिटल माध्यमबाट हुने कारोबारमा उल्लेख्य वृद्धि देखिएको छ, जसमा आरटीजीएस मार्फत ४०३ खर्ब ११ अर्ब ९१ करोड रुपैयाँ कारोबार भएको छ । यसले नेपालको बैंकिङ क्षेत्रमा निजी क्षेत्रलाई कर्जा प्रवाह, निक्षेप वृद्धि र डिजिटल कारोबार विस्तारका सकारात्मक संकेत दिएको छ ।