विद्युत प्राधिकरणको ठूलो आम्दानीः ७० अर्ब कमाई, १९ अर्ब नाफा
काठमाडाैं, १६ फागुन । नेपाल विद्युत प्राधिकरणले चालु आर्थिक वर्षको पहिलो ६ महिनाको अवधिमा ११ अर्ब ३६ करोड रुपैयाँ नाफा कमाएको छ । प्राधिकरणले बिजुली बिक्रीबाट कुल ५३ अर्ब १८ करोड रुपैयाँ आम्दानी गरेको छ ।
चालु आर्थिक वर्षको पहिलो ६ महिनामा विद्युत बिक्री, ब्याज तथा अन्यान्य स्रोतबाट ७० अर्ब ४४ करोड रुपैयाँ आम्दानी गरेको छ। सो अवधिमा विद्युत खरिद, प्रशासनिक खर्च तथा विभिन्न योजनामा ५१ अर्ब ८ करोड रुपैयाँ खर्च भएको छ।
प्राधिकरणका अनुसार चालु आर्थिक वर्षमा अहिलेसम्म १९ अर्ब ३६ करोड रुपैयाँ नाफा आर्जन गरिएको छ ।
विद्युत खरिदतर्फ प्राधिकरणले नेपालका सार्वजनिक तथा निजी उत्पादक कम्पनीहरूलाई ३८ अर्ब ४८ करोड रुपैयाँ भुक्तानी गरिसकेको छ । भारतबाट आयात गरिएको २४ करोड २० लाख युनिट विद्युतका लागि ३ अर्ब ६५ करोड रुपैयाँ खर्च भएको छ ।
त्यस्तै, भारतलाई ३ अर्ब ६० करोड रुपैयाँ बराबरको विद्युत निर्यात गरिएको छ । सरकार तथा वैदेशिक सहायता प्राप्त बजेटअन्तर्गत विभिन्न योजनामा १३ अर्ब ३५ करोड रुपैयाँ विनियोजन गरिएको छ ।
गत वर्ष १८ अर्ब रुपैयाँ घाटामा रहेको प्राधिकरणले यस वर्ष उल्लेख्य सुधार गर्दै नाफा आर्जन गर्न सफल भएको छ ।
