एक अर्ब लगानीमा मोरङमा ‘एलेक्जा’ ब्रान्डको सलाइन पानी उद्योग संचालन, साउनदेखि बजारमा आउने
विराटनगर, १६ वैशाख । मेडिकल व्यावसायी दिनेश ठाकुर र रञ्जित भगतले मोरङमा सलाइन पानी उद्योग संचालनमा ल्याएका छन् ।
मोरङको बुढीगंगामा मेडिकल व्यावसायीद्धय ठाकुर र भगतले एलेक्जा लाइफ साइन्सेस प्रालि स्थापना गरी संचालनमा ल्याएको उक्त उद्योगले साउनदेखि ‘एलेक्जा’ ब्रान्डमा सलाइन पानी बजार पठाउने जानकारी दिइएको छ ।
उद्योगले पहिलो चरणमा अत्यावश्यक मानिने सलाइन पानी एलभीपी उत्पादन बजारमा पठाउँने छ । एलभीपी सलाइन १ सय, ५ सय, १ हजार र ३ हजार एमएल गरी ४ प्रकारका बोतलमा बजारमा आउने छ ।
पूर्ण रूपमा सञ्चालनमा आउँदा एक अर्ब लागत अनुमान गरिएको उद्योगले मासिक ९ लाख बोतल सलाइन पानी उत्पादन गर्ने क्षमता रहेको अध्यक्ष समेत रहेका ठाकुरले बताए । विश्व स्वास्थ्य संगठन र अन्य अन्तर्राष्ट्रिय मापदण्ड अनुसार अत्याधुनिक प्लान्ट स्थापना गरिएको उद्योगको दाबी छ । एलेक्जाले दोस्रो चरणमा सानो परिमाणमा स्मल भोल्युम प्यारेन्टेरल (एसभीपी) उत्पादन गर्ने छ ।
उद्योगले ‘एलेक्जा’ ब्रान्डमा आफ्ना उत्पादन विदेशमा पनि निर्यात गर्ने लक्ष्य राखेको ठाकुरले बताए ।
