पर्यटन बोर्डले नयाँ गन्तव्यको प्रचारमा युवाको साथ लिने, ‘कन्टेन्ट क्रियटरसँग सहकार्य गर्छौं’
काठमाडौं, १७ वैशाख । नेपाल पर्यटन बोर्डले नयाँ गन्तव्यको खोजी र प्रचारका लागि युवा पुस्तालाई जोड्ने अभियान सुरु गरेको छ । मुलुकको पर्यटन प्रबर्द्धनका लागि नयाँ गन्तव्यको वैभव र विशेषतालाई उजागर गर्न युवा पुस्तालाई जोड्ने उद्देश्यले नेपाल पर्यटन बोर्डले मंगलबार काठमाडौंमा ‘कनेक्टिङ कन्टेन्ट क्रियटर विथ प्याकेज क्युरेटर’ नामक एक कार्यक्रम गरेको छ ।
बोर्डले पर्यटकीय उपज उत्पादनकर्ता र पर्यटन व्यवसायीलाई एउटै थलोमा राखेर नयाँ गन्तव्यको प्रबर्द्धनका लागि प्रोत्साहित गरेको हो । कार्यक्रममा सुदूरपश्चिमको अपि हिमालदेखि सुदूरपूर्वको मुन्धुम ट्रेलसम्म पर्यटकीय गन्तव्यको भिडियो प्रस्तुती गरिएको थियो । जसमा सातै प्रदेशका प्रचार र प्रबर्द्धन हुन नसकेका गन्व्यहरुको भिडियो सामग्री प्रस्तुत गरिएको हो ।
कार्यक्रमलाई सम्बोधन गर्दै बोर्डका प्रमुख कार्यकारी अधिकृत (सीईओ) दीपकराज जोशीले विद्यमान पर्यटन प्रबर्द्धन र प्रचारका नयाँ पुस्तालाई जोडेर प्रविधिको भरपूर उपयोग गर्नुपर्ने बताए । उनले भने, ‘लामो इतिहास भएको पर्यटन क्षेत्रको प्रचार गर्दा पुरानै र सीमित गन्तव्यको मात्रै प्रचार भइरहेको छ । पछिल्लो दशकमा विश्वमा पर्यटनको ट्रेन्ड परिवर्तन भइरहेकोले हामीले पनि नयाँ गन्तव्यहरुको खोजी र प्रचारको नयाँ शैली अवलम्बन गर्नुपर्ने भएको छ ।’
अहिले देशभरबाट विभिन्न समूह र व्यक्तिगत तवरबाट युवा पुस्ताले घुमफिर गर्ने र नयाँ गन्तव्यको खोजी गरिरहेको सन्दर्भ उल्लेख गर्दै सीईओ जोशीले भने, ‘देशभरका सातै प्रदेशमा कन्टेन्ट क्रियटरहरुको रुपमा लागिरहनुभएका युवा पुस्ताले खोजी गरेका दूरदरजका वैभवता र विशेषताहरुलाई प्रचार र प्रबर्द्धन गरिरहनुभएको छ । उहाँहरुलाई पर्यटकीय उपज उत्पादकसँग जोड्नका लागि यो कार्यक्रम आयोजना गरिएको हो ।’
सीईओ जोशीले आगामी दिनमा पर्यटन प्रबर्द्धनमा नयाँ रणनीतिका साथ अघि बढ्नुपर्ने र घुमफिर गरिरहेको युवा पुस्तासँगसँगै काम गर्न पर्यटन बोर्ड खुला रहेकोसमेत बताएका छन् । जाेशीले कन्टेन्ट क्रियटरहरुसँग मिलेर पर्यटनलाई रिइम्याजिन गर्न प्रतिबद्ध रहेकाे पनि बताए ।
कार्यक्रममा लेखक तथा हिमाल मिडियाका प्रकाशक सम्पादक कनकमणि दीक्षितले कार्यक्रममा सहभागी पर्यटन उपज उत्पादक र कन्टेन्ट क्रियटरहरुलाई गुणस्तरीय पर्यटन विकासमा लाग्न प्रेरित गरेका छन् । उनले भने, ‘पर्यटन प्रबर्द्धनका लागि हाम्रो परम्परागत शैली परिवर्तन गरेर जानुपर्ने थियो । बोर्डले यो जमर्को गरेको सकारात्मक संकेत हो ।’
‘अब हामीले हामीसँग हिमाल छ, सगरमाथा छ भनेर मात्र नपुग्ने भएकोले सांस्कृति र अन्य प्राकृतिक वैभवताबारे पनि प्रचार गर्न आवश्यक छ । यसका लागि देशभरमा युवा पुस्ताले व्यक्तिगतरुपमा काम गरिरहेको भए पनि पर्याप्त हुन सकेको छैन । यसलाई व्यवस्थितरुपमा सरोकारवाला निकायले मिलेर अघि बढ्नुपर्दछ,’दीक्षितले भने ।
सातै प्रदेशबाट सम्बन्धित प्रदेशका नयाँ पर्यटकीय गन्तव्यको खोजी, सम्भावना र प्रचारको अवस्थासहित भिडियो सामग्री प्रस्तुत गरेका हुन् । कार्यक्रममा कन्टेन्ट क्रियटर र प्याकेज क्युरेटरबीच अन्तर्क्रियासमेत गरिएको थियो ।
