छैटौँ पटक ‘ट्रिपल ए’ सम्मान : स्ट्यान्डर्ड चार्टर्ड बैंकको सुदृढ वित्तीय स्वास्थ्यलाई इक्रा नेपालको मान्यता

काठमाडाैं, १३ जेष्ठ । स्ट्यान्डर्ड चार्टर्ड बैंक नेपालले देशकै प्रमुख क्रेडिट रेटिङ एजेन्सी इक्रा नेपालबाट छैटौँ पटक लगातार ‘ट्रिपल ए’ (AAA) रेटिङ प्राप्त गर्न सफल भएको छ। यो रेटिङ अत्यन्त उच्च सुरक्षाको सूचक मानिन्छ र बैंकले आफ्ना वित्तीय दायित्वहरू समयमै पूरा गर्ने क्षमतामा मजबुत रहेको देखाउँछ।

इक्रा नेपालले बैंकको बलियो पूँजी, उत्कृष्ट सम्पत्ति गुणस्तर र सुदृढ जोखिम व्यवस्थापन क्षमताका आधारमा यो रेटिङ पुनः पुष्टि गरेको हो। चालु आर्थिक वर्षको मध्य अप्रिलसम्म बैंकको पूँजी पर्याप्तता अनुपात १७.४४ प्रतिशत र टियर–१ पूँजी अनुपात १५.१५ प्रतिशत पुगेको देखिएको छ, जुन नेपाल राष्ट्र बैंकले तोकेको न्यूनतम मापदण्डभन्दा धेरै माथि छ।

यस्तै, बैंकको नन–पर्फर्मिङ लोन (एनपिएल) केवल १.४४ प्रतिशत रहेको छ, जुन ‘क’ वर्गका बैंकहरूको औसतभन्दा निकै कम हो। यसले बैंकको कर्जाप्रदर्शन र जोखिम व्यवस्थापनको मजबुती झल्काउँछ।

स्ट्यान्डर्ड चार्टर्ड बैंक नेपालका प्रमुख कार्यकारी अधिकृत (सीईओ)ले यो उपलब्धिलाई बैंकको दीर्घकालीन रणनीतिक दृढता र जिम्मेवार वित्तीय अभ्यासको परिणामका रूपमा व्याख्या गरेका छन्। उनले भने, “हामी हाम्रा ग्राहक र सेयरधनीप्रति प्रतिबद्ध छौँ र भविष्यमा अझ उत्कृष्ट सेवा प्रदान गर्ने दिशामा अघि बढ्नेछौँ।”