ट्रम्पद्वारा एलन मस्कको ‘अमेरिका पार्टी’ घोषणाको आलोचना: ‘हास्यास्पद’ भन्दै सम्बन्धमा थप चिसोपना

पत्रकारहरूसँग कुरा गर्दै राष्ट्रपति ट्रम्पले भने, “तेस्रो पार्टी सुरु गर्नु नै गलत हो । अमेरिका दुई पार्टी प्रणालीमै चलेको छ, र यसमा नयाँ पार्टी थप्दा झन् भ्रम मात्र थपिन्छ ।”

एलन मस्कले पछिल्ला हप्ताहरूदेखि सामाजिक सञ्जाल ‘एक्स’ मा नयाँ राजनीतिक शक्तिको संकेत दिँदै आएका थिए । अन्ततः उनले ‘अमेरिका पार्टी’ अब आधिकारिक रूपमा स्थापना भइसकेको घोषणा गरेका छन् । पार्टीको मुख्य उद्देश्य रिपब्लिकन र डेमोक्र्याटलाई मिलाएर बनेको ‘युनिपार्टी’ लाई सन्तुलनमा ल्याउनु रहेको मस्कले स्पष्ट पारेका छन् ।

मस्क र ट्रम्प विगतमा निकट सहयोगी थिए । मस्कले संघीय खर्च घटाउने उद्देश्यसहित गठन गरिएको एक समूहको नेतृत्वसमेत गरेका थिए । तर, पछिल्ला महिनामा दुईबीचको सम्बन्ध बिग्रँदै गएको देखिन्छ । आइतबार ट्रम्पले आफ्नो प्लेटफर्म ‘ट्रुथ सोशल’ मा मस्कप्रति कडा टिप्पणी गर्दै मस्क पछिल्ला पाँच हप्तामा पूर्णरूपमा ‘अफ द रेल्स’ अर्थात् नियन्त्रण बाहिर गएको उल्लेख गरेका थिए ।

ट्रम्पले विशेष रूपमा मस्कको इलेक्ट्रिक भेइकल म्यान्डेट प्रस्तावको आलोचना गरे । उनले भने, “त्यो प्रस्तावले छोटो समयमा सबैलाई जबर्जस्ती विद्युतीय सवारी किन्न बाध्य पार्ने थियो,” जसलाई उनले सुरुदेखि नै अस्वीकार गर्दै आएका थिए । यसै सन्दर्भमा, राष्ट्रपतिले जुलाई ४ मा हस्ताक्षर गरेको नयाँ कर र खर्च योजनाले इलेक्ट्रिक सवारीमा दिइने कर छुट अन्त्य गरेको छ । सो योजनाले सीमा सुरक्षा, रक्षा र ऊर्जा उत्पादनमा खर्च वृद्धि गरेको छ भने स्वास्थ्य र खाद्य सहायता कार्यक्रमहरूमा भने कटौती गरिएको छ ।

यसैबीच, मस्कले आफ्नो नयाँ पार्टीले आगामी राष्ट्रपतीय चुनावमा उम्मेदवार उठाउन सक्ने भए पनि हालको ध्यान प्रतिनिधि सभा र सिनेट चुनावमा केन्द्रित रहने स्पष्ट पारेका छन् । अहिलेको अवस्था हेर्दा, ट्रम्प र मस्कबीचको सम्बन्धमा आएको चिसोपनाले अमेरिकी राजनीति अझ तनावपूर्ण मोडतर्फ गइरहेको संकेत देखिन्छ ।