सिन्धु विकास बैंकको खुद नाफामा २८७.६० प्रतिशतको आश्चर्यजनक वृद्धि
काठमाडाैं, ६ साउन । सिन्धु विकास बैंक लिमिटेडले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण अनुसार ११ करोड ७८ लाख रुपैयाँ खुद नाफा कमाएको छ। यो नाफा अघिल्लो आर्थिक वर्षको सोही अवधिको तुलनामा २८७.६० प्रतिशत बढी हो, जसले बैंकको आर्थिक स्वास्थ्यमा उल्लेखनीय सुधारको संकेत गर्दछ।
अघिल्लो वर्षको अन्त्यसम्म बैंकले केवल ३ करोड ४ लाख रुपैयाँ खुद नाफा कमाएको थियो। यद्यपि, यो वर्षको नाफा वृद्धिका कारणहरूले गर्दा बैंकको वित्तीय प्रदर्शनमा सकारात्मक प्रभाव परेको छ।
समीक्षा अवधिमा बैंकको खुद ब्याज आम्दानी ३०.१४ प्रतिशत घटेर १३ करोड ३७ लाख ५२ हजार रुपैयाँ पुगेको छ भने खुद फि तथा कमिशन आम्दानी ३४.५३ प्रतिशत घटेर १ करोड ४३ लाख ४४ हजार रुपैयाँ कायम भएको छ।
बैंकको कुल सञ्चालन आम्दानी ३०.४९ प्रतिशत घटेर १५ करोड ६ लाख ७६ हजार पुगेको छ भने सञ्चालन मुनाफा भने ४१७.३९ प्रतिशत बढेर १५ करोड ३५ लाख ६१ हजार पुगेको छ।
खराब कर्जाको अनुपात १०.६३ प्रतिशतबाट घटेर ६.०३ प्रतिशत मा सीमित भएको छ, जसले बैंकको वित्तीय स्थिति सुधारमा मद्दत पुर्याएको छ। यस कारणले गर्दा बैंकको इम्पेरमेन्ट चार्ज १७ करोड ९० लाख रुपैयाँ रिभर्स भएको छ।
नाफासँगै, बैंकको प्रतिशेयर आम्दानी पनि १५ रुपैयाँ ६९ पैसा बढेर २१ रुपैयाँ १५ पैसा पुगेको छ। यस वर्षको बैंकको मूल्य आम्दानी अनुपात ४०.९९ गुणा रहेको छ भने प्रतिशेयर नेटवर्थ ८६ रुपैयाँ ७० पैसा रहेको छ।
यस बैंकको ५५ करोड ७४ लाख रुपैयाँ चुक्ता पूँजी रहेको छ भने जगेडा कोष ७ करोड ४१ लाख रुपैयाँ ऋणात्मक रहेको छ। पछिल्लो एक वर्षमा बैंकको निक्षेप ३.५८ प्रतिशत घटेको छ भने कर्जा ९.३४ प्रतिशत घटेको देखिएको छ।
