बागमतीमा नयाँ मुख्यमन्त्रीका लागि दाबी भोलि दिउँसो २ बजेसम्म
काठमाडाैं, १९ साउन । बागमती प्रदेशमा नयाँ मुख्यमन्त्री नियुक्ति प्रक्रिया औपचारिक रूपमा सुरु भएको छ। हालका मुख्यमन्त्री बहादुरसिंह लामाले साउन १८ गतेदेखि लागू हुने गरी राजीनामा दिएपछि प्रदेश प्रमुख दीपकप्रसाद देवकोटाले संविधानअनुसार नयाँ नेतृत्व चयनका लागि प्रक्रिया अघि बढाएका हुन्।
संविधानको धारा ६८(२) अनुसार, प्रदेशसभामा बहुमत प्राप्त गर्न सक्ने प्रदेशसभा सदस्यले भोलि (मंगलबार) दिउँसो २ बजेसम्म मुख्यमन्त्री पदका लागि आफ्नो उम्मेदवारी दर्ता गराउन सक्ने प्रदेश प्रमुख कार्यालयले जनाएको छ।
मुख्यमन्त्री लामाले आज स्वकीय सचिवमार्फत राजीनामा बुझाएका थिए। अब गठबन्धन वा दलगत समीकरणअनुसार बहुमतको दाबी पेश गरी नयाँ मुख्यमन्त्रीको नियुक्ति हुने प्रक्रिया अगाडि बढेको हो।
नयाँ नेतृत्वका लागि प्रदेशसभामा चल्ने राजनीतिक कसरतले बागमतीको सत्ता समीकरणमा फेरबदल हुने संकेत देखिएको छ।
