चन्द्रकुवेर खापुङ बने ३२औं प्रहरी महानिरीक्षक
काठमाडाैं, १३ भदौ । नेपाल प्रहरीको ३२औं महानिरीक्षक (आईजीपी)मा अतिरिक्त महानिरीक्षक (एआईजी) चन्द्रकुवेर खापुङ नियुक्त भएका छन्।
शुक्रबार बालुवाटारमा बसेको मन्त्रिपरिषद् बैठकले पहिलो वरीयतामा रहेका एआईजी खापुङलाई महानिरीक्षकमा नियुक्त गरेकाे हाे । खापुङ आफ्नो ब्याचका एक्ला एआईजी हुन्। अरू एआईजी उनीभन्दा जुनियर हुन्। हालका प्रहरी महानिरीक्षक दीपक थापा यही भदौ १८ गते अनिवार्य अवकाश जाँदैछन् ।
संगठनभित्र खापुङ इमान्दार र विवादरहित अधिकृतका रूपमा चिनिन्छन् । उनी हाल केन्द्रीय अनुसन्धान ब्युरो (सीआईबी) प्रमुखको जिम्मेवारीमा छन् । यसअघि उनले कोशी प्रदेश प्रहरी र काठमाडौं उपत्यका अपराध अनुसन्धान कार्यालयको कमान्ड सम्हाल्दा प्रभावकारी काम गरेका थिए ।
