ब्याजदर घटेपछि अटो बजारमा नयाँ जीवन: निजी सवारी कर्जा बढ्यो
काठमाडाैं, २२ भदाै । नेपालको अटो बजार लामो समयको सुस्ततालाई पछि पार्दै पुन: गतिशील बन्दैछ। सस्तो ब्याजदर र सहज कर्जा प्रवाहले सवारी खरिदमा नयाँ उत्साह ल्याएको छ।
नेपाल राष्ट्र बैंकका वार्षिक तथ्याङ्क अनुसार आर्थिक वर्ष २०८१–८२ मा हायर पर्चेज कर्जा ४ अर्ब ५९ करोड रुपैयाँले बढेर कुल १ खर्ब २८ अर्ब ६९ करोड रुपैयाँ पुगेको छ। अघिल्लो वर्ष यो रकम १ खर्ब २४ अर्ब १० करोड रुपैयाँ थियो।
निजी प्रयोजनका सवारी साधनको कर्जा विशेषगरी बढेको देखिन्छ। निजी सवारी कर्जा १५.६ प्रतिशत वृद्धि भई ४२ अर्ब ५८ करोड रुपैयाँ पुगेको छ, अघिल्लो वर्ष ३६ अर्ब ८४ करोड मात्रै थियो।
व्यावसायिक सवारी कर्जा भने घटेको देखिन्छ। गत वर्ष व्यवसायिक सवारी कर्जा ८६ अर्ब १० करोड रुपैयाँ प्रवाह भए पनि अघिल्लो वर्षको तुलनामा १.३२ प्रतिशत कम हो।
ब्याजदरमा आएको गिरावटले सवारी कर्जा प्रवाहमा ठूलो भूमिका खेलेको छ। बैंकहरूको औसत आधार दर हाल ६.५ प्रतिशतसम्म झरेको छ। करिब १–१.५ प्रतिशत प्रिमियम जोड्दा पनि गाडी खरिदका लागि ८ प्रतिशत हाराहारीमा कर्जा पाइने अवस्था छ।
वाणिज्य बैंकहरूले प्रवाह गरेको हायर पर्चेज कर्जा ५.८२ प्रतिशत बढेर १ खर्ब ६ अर्ब ८६ करोड रुपैयाँ पुगेको छ।
सवारी क्षेत्रमा सबैभन्दा ठूलो लगानी ग्लोबल आइएमई बैंकको १५ अर्ब ५८ करोड ४३ लाख रुपैयाँ रहेको छ। नबिल बैंक ११ अर्ब ४३ करोड १ लाख र राष्ट्रिय वाणिज्य बैंक ९ अर्ब ६२ करोड ७९ लाख रुपैयाँ कर्जा प्रवाह गरेका छन्।
सबैभन्दा ठूलो वृद्धिदर एभरेष्ट बैंकमा देखिएको छ। बैंकले सवारी कर्जा ५९.९२ प्रतिशत बढाएर ५ अर्ब ५४ करोड ६६ लाख रुपैयाँ पुर्याएको छ। नेपाल एसबिआई बैंक ४६.६० प्रतिशत, कृषि विकास बैंक ३८.३६ प्रतिशत, सानिमा २३.१३ प्रतिशत र एनएमबि १४.४८ प्रतिशतले कर्जा वृद्धि गरेका छन्।
यता, १० बैंकले हायर पर्चेज कर्जा घटाएका छन्। एनआइसी एशियाको कर्जा ४०.१९ प्रतिशत घटेको छ। अन्य घटेका बैंकमा स्ट्याण्डर्ड चार्टर्ड ३८.६०%, कुमारी २८.२५%, लक्ष्मी सनराइज १३.८०%, माछापुच्छ्रे १३.४%, हिमालयन ४.०२%, सिद्धार्थ २%, नेपाल इन्भेष्टमेन्ट मेगा १.९०%, प्रभू ०.६०%, र सिटिजन्स ०.०६% रहेका छन्।
