प्रचण्ड निवास अगाडि प्रहरी बिट भत्काइयो, उपत्यकामा कर्फ्यू
काठमाडाैं, २४ भदाै । २० जना युवाको मृत्युपछि सुरु भएको आन्दोलन दोस्रो दिन पनि उग्र बन्दै गएको छ। मंगलबार बिहान प्रदर्शनकारीहरूले खुमलटारस्थित नेकपा माओवादी केन्द्रका अध्यक्ष पुष्पकमल दाहाल प्रचण्डको निवास जाने सडकमा रहेको प्रहरी बिट भत्काएका छन्।
आक्रोशित युवाहरूले काठमाडौं उपत्यकाका विभिन्न स्थानमा टायर बाल्दै सडकमा प्रदर्शनलाई अझ उग्र पारेका छन्। कलंकीमा सडक अवरुद्ध गर्दै टायर बालिएको छ भने नयाँ बानेश्वरस्थित संसद भवन अगाडि सरकारविरुद्ध चर्को नाराबाजी भइरहेको छ। हालसम्म स्थिति भने प्रहरीको नियन्त्रणमै रहेको बताइएको छ।
सुरक्षाजन्य जोखिम बढ्दै गएपछि काठमाडौं, ललितपुर र भक्तपुर जिल्लामा स्थानीय प्रशासनले कर्फ्यू आदेश जारी गरेको छ। यससँगै उपत्यकामा सुरक्षाकर्मीहरूको उपस्थिति अझै बढाइएको छ।
प्रदर्शनकारीको आक्रोश र कर्फ्यूका कारण उपत्यकाको जनजीवन प्रभावित भएको छ भने आमसर्वसाधारण त्रसित बनेका छन्।
