जीवन बीमा व्यवसाय १७% वृद्धिसँगै दुई महिनामा ३५ अर्ब नाघ्यो
काठमाडाैं, १० असाेज । चालु आर्थिक वर्ष २०८२–८३ को साउन र भदौ महिनामा नेपालमा जीवन बीमा व्यवसाय १७ प्रतिशतले वृद्धि भएको छ। दुई महिनाभित्र कम्पनीहरूले ३५ अर्ब २४ करोड ९७ लाख २६ हजार रुपैयाँ बराबरको बीमा शुल्क आर्जन गरेका छन्।
गत वर्षको सोही अवधिको तुलनामा १७.१५ प्रतिशत वृद्धि भएको हो। गत आवको साउन–भदौमा ठूला जीवन बीमा कम्पनीहरूले ३० अर्ब ८ करोड ८२ लाख रुपैयाँ बराबरको बीमा शुल्क आर्जन गरेका थिए।
दुई महिनामा ३ लाख ३५ हजार ७७१ वटा नयाँ बीमालेख जारी भएका छन्। हाल सक्रिय बीमालेखको संख्या १ करोड १४ लाख ५० हजार ४७७ रहेको छ। नयाँ व्यवसायमार्फत ६ अर्ब ५४ करोड ११ लाख ५१ हजार रुपैयाँ संकलन भएको छ भने पुरानै व्यवसायबाट २८ अर्ब ७० करोड ८५ लाख रुपैयाँ उठेको छ।
व्यवसायको अग्रस्थानमा नेपाल लाइफ रहेको छ। कम्पनीले दुई महिनाभित्र ९ अर्ब ६८ करोड ३२ लाख ९० हजार रुपैयाँ बराबरको बीमा शुल्क आर्जन गरेको छ, जुन गत वर्षको सोही अवधिको तुलनामा ७.१५ प्रतिशत बढी हो। दोस्रो स्थानमा राष्ट्रिय जीवन बीमा कम्पनी रहेको छ, जसले ४ अर्ब ८ करोड ३ लाख रुपैयाँ आर्जन गरेको छ, गत वर्षको सोही अवधिमा १ अर्ब ६ करोड ४७ लाख मात्र थियो।
नेशनल लाइफ इन्स्योरेन्स तेस्रो स्थानमा रहेको छ, कम्पनीले ३ अर्ब ९८ करोड २७ लाख रुपैयाँ बराबरको व्यवसाय भित्र्याएको छ, ११.१० प्रतिशत वृद्धिदरसहित। चौथो र पाँचौं स्थानमा क्रमशः लाइफ इन्स्योरेन्स कर्पोरेशन नेपाल (३ अर्ब ३९ करोड ४२ लाख) र हिमालयन लाइफ (३ अर्ब १७ करोड २३ लाख) रहेका छन्। यी दुई कम्पनीको वृद्धिदर क्रमशः २.६२% र २.२८% रहेको छ।
अन्य कम्पनीहरूमध्ये सूर्यज्योति लाइफ २ अर्ब १ करोड ५२ लाख, सिटिजन लाइफ १ अर्ब ५० करोड १३ लाख, एशियन लाइफ १ अर्ब ४८ करोड ४२ लाख, सानिमा रिलायन्स १ अर्ब २० करोड ४२ लाख, आइएमई लाइफ १ अर्ब ५ करोड ५८ लाख, मेट लाइफ १ अर्ब ५ करोड ४९ लाख र रिलायबल नेपाल १ अर्ब १ करोड ४० लाख रुपैयाँ बराबरको बीमा शुल्क आर्जन गरेका छन्।
प्रभू महालक्ष्मी लाइफले ९६ करोड ९८ लाख र सन नेपाल लाइफले ६० करोड ६६ लाख रुपैयाँ आर्जन गरेको छ। गत वर्षको तुलनामा सन नेपाल लाइफको व्यवसाय २२२.१७ प्रतिशत घटेको छ। अन्य सबै कम्पनीहरूले सकारात्मक वृद्धिदर देखाएका छन्।
