काठमाडौंका सडकमा माग्ने नभएको प्रधानमन्त्रीको अपरिपक्क दाबी, सबै माग्ने तत्काल हटाउन असम्भव
बिआर बुढाथोकी
काठमाडौं, ६ वैशाख । केही समय अघि प्रधानमन्त्री केपी शर्मा ओलीले सार्वजनिक कार्यक्रममा काठमाडौंका सडकमा माग्ने नभएको अभिव्यक्ति दिए । उनले अब काठमाडौंका सडकमा माग्ने कसैले देखे प्रहरीलाई खबर गर्नु पनि भन्न भ्याए । माग्ने नियन्त्रण गर्न सरकारले १ करोड रुपैयाँको अक्षय कोषको व्यवस्था गरिदिएको पनि उनले बताए । उनको भनाई थियो –‘अब मागेर खान कसैले पर्दैन । सडकमा कसैले मागेको देख्नु भयो भने प्रहरीलाई भन्नुहोला, प्रहरीले ठीक लगाइदिन्छ ।’
भिख माग्ने मागेकै छन्
केही दिन अघि महानगरीय प्रहरी कार्यालय रानीपोखरी अगाडि एक महिला भिख मागिरहेकी भेटिइन् । त्यहाँ प्रधानमन्त्रीको कुरा मिलेन । त्यस्तै अर्को ठाउँ कान्तिपथ (केशरमहल अगाडी) पनि बालबालिकाहरु मागिरहेका दैनिक जसो भेटिन्छन् । यो त एउटा उदाहरण मात्रै हो । काठमाडौंका अति व्यस्त ठाउँहरुमा माग्नेको कमी छैन् । सुन्धारा, रत्नपार्क, कोटेश्वर, कलंकी, बल्खु जस्ता व्यस्त ठाउँहरुमा अझै पनि माग्नेहरु प्रशस्तै भेटिन्छन् । अझ शनिबार भिडभाड हुने मन्दिरहरुमा माग्नेहरुको लाइनै हुन्छ ।
माग्ने हटाउन तत्काल सम्भव छैन–एसएसपी लामा
महानगरीय प्रहरी परिसर, काठमाडौंका प्रमुख एसएसपी बसन्तकुमार लामाका अनुसार काठमाडौंका मागि खानेहरुको व्यवस्थापन गर्न धेरै गाह्रो छ । माग्नेहरुका अनेकौं समस्या भएको र कतिपय भारतबाट आएकाले पनि तिनीहरुलाई व्यवस्थापन तत्काल सम्भव नभएको उनले अर्थको अर्थलाई बताए । उनले भने –‘माग्नेहरु त्यतिकै भिख माग्न बसेका हुँदैनन् । तिनीहरुका पनि अनेकौं समस्या हुन्छन् । ती समस्या पहिचान गरेर विभिन्न संस्थासँग समन्वय गरी व्यवस्थापन गर्नु पर्ने भएकोले तत्काल सबै माग्नेहरु काठमाडौंका सडकबाट हट्दैनन् ।’
हालसम्म प्रहरी परिसरले २ सय माग्नेहरुलाई विभिन्न आश्रममा व्यवस्थापन गरेको छ । केहीलाई व्यवस्थापन गरेको भएपनि काठमाडौंका सबैलाई विस्थापन गर्न समय लाग्ने छ । भारतबाट नेपालमा आएकाहरुलाई भारतमा नै पठाइने छ भने घरपरिवार भएकालाई घरपरिवारसँग छलफल गरेर घरमा नै फिर्ता पठाइने प्रहरीको तयारी छ । त्यसको लागि भारतका संघ संस्थाहरुसँग कुरा गरिने योजना काठमाडौ महानगर र महानगरीय प्रहरी परिसर काठमाडौंले बनाएको छ । महानगर र प्रहरी परिसरले माग्ने व्यवस्थापनलाई तेस्रो प्रथमिकतामा राखेको छ । पहिलो प्राथमिकतामा काठमाडौं उपत्यकाका घरहरुमा प्रहरी कार्यालयका फोन नम्बरहरुसहितका स्टीकर टाँस्ने, दोस्रोमा काठमाडौंका हस्पिटलहरुमा धुम्रपान निषेध गर्ने र तेस्रोमा काठमाडौंका माग्नेहरुलाई व्यवस्थापन गर्ने योजना रहेको प्रहरी परिसर काठमाडौंले जनाएको छ ।
दुई चरणका काम सम्पन्न गर्दा माग्ने व्यवस्थापनमा केही ढिलाई हुने एसएसपी लामाले जानकारी गराए । धेरै स्वास्थ्य र शारीरिक समस्या रहेकोले उनीहरुलाई उचित स्वास्थ्य उपचार र बस्ने बासको व्यवस्था महानगरले मिलाई रहेको छ । त्यसको लागि आर्थिक अभाव पर्ने भएकाले अर्थिक जुटाउँने काम महानगरबाट भईरहेको पनि उनले जानकारी गराए । तर, सरकारले उपलब्ध गराएको १ करोड रुपैयाँको अक्षय कोषको बारेमा छलफल नभएको उनी बताउछन् ।
प्रधानमन्त्रीको र प्रहरीको कुरामा तालमेल मिलेन
यसरी विश्लेषण गर्दा प्रधानमन्त्री केपी शर्मा ओलीले केही दिन अघि दिएका अभिव्यक्ति र महानगरीय प्रहरी परिसर काठमाडौंको कुरामा तालमेल छैन । प्रधानमन्त्रीले माग्ने देख्ने बित्तिकै प्रहरीलाई खबर गर्नु भने पनि परिसर प्रमुख बसन्तकुमार लामाका अनुसार प्रहरी तत्काल केही गर्न नसक्ने अवस्थामा छ ।
