पुनर्निर्माणमा खटिएका प्राविधिकको सामुहिक राजीनामा, प्राधिकरण सिईओ भन्छन् –माग सम्बोधन भइसक्यो
काठमाडौं, १३ बैशाख । राष्ट्रिय पुनर्निर्माण प्राधिकरणका करिब ४ हजार प्राविधिकहरुले सामूहिक राजीनामाको घोषणा गरेका छन् । आफूहरुले अघि सारेका मागप्रति सरकार संवेदनशील नभएको भन्दै हिजो उनीहरुले राजीनामाको घोषणा गरेका हुन् ।
राष्ट्रिय पुननिर्माण प्राधिकरणः प्राविधिक राष्ट्रिय हकहित संरक्षण समितिले गत चैत ३ गतेबाट देशव्यापी आन्दोलन गर्दै आएको छ । नेपालको इतिहासमै प्राविधिक जगतको सबैभन्दा ठूलो सडक संघर्षसमेत चैत्र १० गते काठमाडौंमा भएको समितिको भनाइ छ । यति हुँदाहुँदै पनि आफूहरुको जायज मागको सुनुवाई गर्नुको साटो उल्टै आफूहरुलाई सेवा सुविधाबाट वञ्चित गराइएकाले बाध्य भएर सामूहिक राजीनामा दिनु परेको समितिका अध्यक्ष ई.अविनाश अमरले बताए ।
उत्ता, राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशिल ज्ञवालीले प्राविधिकहरुको माग पुरा भइसकेको बताए । नेपाल इन्जिनियर्स एशोसिएसनका पदाधिकारीहरु समेतको उपस्थितीमा माग सम्बोधन गरिएकोबार जानकारी गराइसकिएको बताए । तत्काल काममा नफर्किए कडा कदम चाल्ने चेतावनी दिए ।
