दक्षिण एसियाली मुलुकका स्टक एक्सचेन्जहरुको छाता संगठन सेफमा नयाँ नेतृत्व चयन
काठमाडौं, १८ जेठ । दक्षिण एसियाली मुलुकका स्टक एक्सचेन्जहरुको छाता संगठन साउथ एसियन फेडेरेसन अफ एक्सचेन्जेज (सेफ) को १४ औं वार्षिक अधिवेशन तथा कार्यसमितिको बैठक सम्पन्न भएको छ । सेफसँगको समन्वयमा नेपाल स्टक एक्सचेन्ज लिमिटेड र मर्कन्टायल एक्सचेन्ज नेपाल लिमिटेडको सह आयोजनामा ‘मोर्डनाइजेसन अफ क्यापिटल मार्केट इन नेपाल एन्ड एक्रस द बोर्डर’ विषयमा एक दिने छलफल कार्यक्रम सम्पन्न भएको हो ।
शुक्रबार सम्पन्न सेफको १४ औं अधिवेशनमा सर्वसम्मत नयाँ कार्यसमितिको चयन गरिएको छ । जस अनुसार रोयल स्टक एक्सचेन्ज अफ भुटानका प्रमुख कार्यकारी अधिकृत दोर्जि फुन्ट्सो अध्यक्ष र मर्कन्टायल एक्सचेन्ज नेपाल लिमिटेडका प्रमुख कार्यकारी अधिकृत जितेश सुरेन्द्रन सेफको उपाध्यक्ष पदमा नियुक्त भएका हुन् । उनीहरुको कार्यकाल आगामी दुई वर्षको हुने छ । अधिवेशनले सेफको विधान संशोधन गर्नुका साथै संस्थाको पुनर्संरचना गर्ने, कार्य समितिको आगामी बैठक बस्ने स्थान र मिति तय गरेको जानकारी दिइएको छ ।
