नेपाल पुनर्बीमा कम्पनी छैठौ वर्षमा प्रवेश, जाथाभावी बीमा कार्यक्रम सञ्चालन नगर्न अर्थमन्त्रीको आग्रह

काठमाडौँ २२ कात्तिक । अर्थमन्त्री डा.युवराज खतिवडाले बीमा ऐनमा तोकिएको प्रक्रिया पुरा गरेका कम्पनीले मात्रै बीमा कार्यक्रम सञ्चालन गर्न आग्रह गरेका छन् । नेपालमा सहकारी, नागरिक लगानी कोष, कर्मचारी सञ्चय कोष लगायतका संस्थालेसमेत बीमा कार्यक्रम सञ्चालन गरेपछि मानिसहरु अन्यौलमा परेको बताएका हुन् । नेपाल पुनर्बीमा कम्पनीको छैठौ वार्षिकोत्सव समारोहलाई सम्बोधन गर्दै मन्त्री खतिवडाले धेरै संस्थाले बीमा कार्यक्रम चलाउँदा कम्पनी र एजेण्ट छुट्याउँन कठिन भएको बताएका हुन् ।

त्यस्तै, कार्यक्रममा मन्त्री खतिवडाले कम्पनीहरुलाई जति सक्दो छिटो दाबीको भुक्तानी गर्न आग्रह गरे । निर्धारित समयमा दाबीको भुक्तानी गरि बिमितलाई राहत पुराउँन समेत उनले निर्देशन दिएका छन् । त्यस्तै बीमा क्षेत्रमा बढ्दै गएको विसंगति प्रति पनि उनले चिन्ता व्यक्त गरे । “आफनै घरमा आगो लगाएर कृत्रिम क्षतिको बीमा दाबी गर्नेहरु विरुद्ध कडा रुपमा प्रस्तुत हुनुहोस्,” उनले भने । तर, बास्तविक पीडितलाई भने समयमा भुक्तानी दिन उनले आग्रह गरे ।

त्यस्तै, बीमा समितिका अध्यक्ष चिरञ्जीवी चापागाईले पुनर्बीमा कम्पनीले नेपालबाट बाहिरिने रकमलाई नेपाल भित्र होल्ड गर्न सहयोग गरेको बताए । नेपाल पुनर्बीमा कम्पनीका अध्यक्ष महेश गुरागाईले भने कम्पनीले प्राथमिक सेयर जारी गर्ने तयारी गरेको बताए । आईपिओका लागि कम्पनीले नेपाल धितोपत्र बोर्ड र कम्पनी रजिष्ट्रार कार्यलयमा निवेदन दिएको उनले बताए ।

२९ मुलुकमा व्यवसाय विस्तार गर्दै नेपाल पुर्नबीमा कम्पनी
नेपाल पुनर्बीमाले २९ वटा मुलुकमा आफ्नो व्यवसाय विस्तार गर्न सफल भएको छ । स्थापनाको पाँचौ बर्षको अवधिमा कम्पनीले भारत, बंगलादेश, अफ्रिका लगायतका मुलुकमा आफ्नो व्यवसाय बिस्तार गरिसकेको छ । उक्त मुलुकबाट नेपाल पुनर्बीमा कम्पनीले ८४ करोड २ लाख रुपैयाँ बिमाशुल्क आर्जन गर्न सफल भएको छ ।

कम्पनीले गत आर्थिक बर्षमा १ अर्ब १७ करोड रुपैयाँ नाफा आर्जन गर्न सफल भएको छ । अघिल्लो आवमा भने कम्पनीले १ अर्ब रुपैयाँ नाफा आर्जन गरेको थियो । त्यस्तै, गत आवमा कम्पनीले ६ अर्ब ८८ करोड रुपैयाँ बीमाशुल्क आर्जन गर्न सफल भएको छ । गत आवमा भने कम्पनीले ४ अर्ब २३ करोड रुपैयाँ आर्जन गरेको थियो । कम्पनीको नेटवर्थ १२ अर्ब ५६ लाख रुपैयाँ रहेको छ भने कुल सम्पति १७ अर्ब ८० लाख रुपैयाँ रहेको छ ।

कम्पनीमा नेपाल सरकारको ४४.०४ प्रतिशत लगानी रहेको छ । अन्य जीवन, निर्जीवन तथा अन्य पब्लिक कम्पनीको ३९.९६ प्रतिशत लगानी रहेको छ । सर्वसाधारण तथा कर्मचारीको लागि १६ प्रतिशत छुट्टाईएको छ ।

कम्पनीले ह्यानओभर रि, क्यानोपिअस, एभरेष्ट रि, जिआईसी रि लगतयका कम्पनीसँग रेट्रोशेसन गर्दै आएको छ ।

आतंकबादले जन्मायो पुनर्बीमा कम्पनी
२०५८ साल भदौ २६ गते अमेरिकामा भएको आतंककारी आमक्रमणबाट अर्बो रकमको क्षति भयो । परिणामस्वरुप विश्व बीमा क्षेत्रमा नै ठूलो उथल पुथल आयो । तत्पश्चात बीमा क्षेत्रमा नयाँ जोखिमको रुपमा आतंकबादको शुरुवात भयो । त्यसपछि विश्वमा आतंकबादको जोखिमको लागि छुट्टै बीमाशुल्क निर्धारण गरियो । तत्कालिन समयमा नेपालमा पनि द्वन्द्व चर्किएको थियो । विदेशी पुनर्बीमा कम्पनीले उक्त द्धन्द्धलाई आतंकबादको संज्ञा दिए ।

उक्त जोखिमको सुरक्षाको लागि थप शुल्क माग गर्न थाले । कतिपय कम्पनीले त्यस्तो जोखिमको पुनर्बीमा आनाकानी गर्न थाले । उक्त समस्यालाई समाधान गर्न सरकारको नेतृत्वमा बीमा कम्पनीहरुको संलग्नतामा २०६१ सालमा आकस्मिक बीमा कोषको स्थापना भयो । जसमा सरकारले ५ करोड र बीमा कम्पनीहरुबाट ६ करोड गरी जम्मा ११ करोड रुपैयाँको कोष खडा गरियो । २०७१ कार्तिक २१ गते सोही कोषलाई पुनर्बीमा कम्पनीमा परिणत गरियो । जसमा नेपाल सरकारको ४३.५५ प्रतिशत, निर्जीवन बिमा कम्पनीको ३८.३९ प्रतिशत र जीवन बिमा कम्पनी तथा अन्य पब्लिक कम्पनीको १८.०६ प्रतिशत लगानी रहेको छ ।