महासंघका आगामी अध्यक्ष गोल्छालाई ‘डाइनामिक व्यक्ति’ भन्दै ढकालले गरे प्रशंसा,तर गोल्छा अनुपस्थित
काठमाडौं, १४ फागुन । नेपाल उद्योग वाणिज्य महासंघको आगामी चैत २८ र २९ गते ५४ औं साधारण सभा हुँदैछ । सो साधारण सभाबाट हालका बरिष्ठ उपाध्यक्ष शेखर गोल्छा स्वतः अध्यक्ष हुनेछन् ।
महासंघको विधानमा वरिष्ठ उपाध्यक्ष नै अर्को कार्यकालमा स्वतः अध्यक्ष हुने व्यवस्था छ।
सोही अनुसार आगामी साधारण सभाले जसलाई बरिष्ठ उपाध्यक्ष बनाउने छ, सो व्यक्ति गोल्छा पछि महासंघको नेतृत्वमा पुग्ने छ । बरिष्ठ उपाध्यक्षका लागि चन्द्रप्रसाद ढकाल र किशोर प्रधानले उम्मेदवारी घोषणा गरेका छन् ।
प्रधानले यसअघि बिराटनगरबाट र ढकालले आज काठमाडौंको होटल याक एन्ड यतीमा कार्यक्रम गरेर उम्मेदवारी घोषणा गरे ।
प्रधानलाई दुई महिनापछि महासंघको स्वतः अध्यक्ष बन्न लागेका गोल्छाले साथ दिएका छन् । सोही कारण आज ढकालको उम्मेदवारी घोषणा कार्यक्रममा निमन्त्रणा गरेपनि गोल्छा उपस्थित भएनन् । तर उम्मेदवारी घोषणा कार्यक्रममा ढकालले गोल्छालाई ‘डाइनामिक व्यक्ति’ भएको भन्दै खुलेर प्रशांसा गरे ।
महासंघलाई व्यवसायीक हकहितमा लगाउनका सशक्त टिम बनाउन आवश्यक रहेको भन्दै उनले गोल्छाको नेतृत्वमा आगामी कार्यकालका लागि सशक्त टिम बन्ने विश्वास व्यक्त गरे । उनले आफ्नो उम्मेदवारी पनि त्यसैको अंश भएको बताए । ‘हालका बरिष्ठ उपाध्यक्ष शेखर गोल्छाको नेतृत्वमा एउटा सशक्त टिम बन्ने छ,’ उनले भने, ‘हामी १, १ जोडेर २ होइन ११ बनाउने गरि काम गर्ने छौं ।’
देशमा औद्योगिक वातावरण बनाउन र स्वदेशी लगानीकर्ताको संरक्षणसँगै विदेशी लगानी भित्र्याउन उक्त टिमले पहल गर्ने उनले बताए ।
