निजी प्रयोगशालाले पनि कोरोना परीक्षण गर्न पाउने, प्रयोगशालाले मन्त्रालयबाट छुट्टै अनुमति भने लिनुपर्ने
काठमाडौं, १६ वैशाख । नेपालमा अबदेखि निजी प्रयोगशालाले पनि कोरोना (कोभिड १९)को परीक्षण गर्न पाउने भएका छन् । मापदण्ड पूरा गरेका निजी प्रयोगशालाले कोरोनाका सम्भाव्य बिरामीको स्वाबको नमूना परीक्षण गर्न पाउने स्वास्थ्य तथा जनसंख्या मन्त्रालयले जानकारी दिएको छ । तर, सञ्चालन मापदण्ड पूरा गर्ने प्रयोगशालाले मन्त्रालयबाट छुट्टै अनुमति भने लिनुपर्ने मन्त्रालयका प्रवक्ता डा. विकास देवकोटाले जानकारी दिएका छन् ।
सोमवार मन्त्रालयले आयोजना गरेको नियमित पत्रकार सम्मेलनका क्रममा प्रवक्ता डा. देवकोटाले अब निजी प्रयोगशालाले पनि कोभिड १९ को परीक्षणका लागि बाटो खुला भएको बताए । कोभिड परीक्षणका लागि मन्त्रालयले प्रयोगशालाको न्यूनतम मापदण्डको निर्देशिका जारी गरिसकेको छ ।
सोमवारसम्म नेपालमा कोरोना संक्रमितको संख्या ५२ पुगेको छ, जसमा १६ जना निको भएसकेका छन् । सोमवारसम्म नेपालमा आरडीटी विधिबाट ४३ हजार ६३ नमूना र पीसीआर विधिबाट १० हजार ४ सय ७१ परीक्षण भएको छ । दुवै विधिबाट हालसम्म ५३ हजार ५ सय ३४ ओटा परीक्षण भएको प्रवक्ता देवकोटाले जानकारी दिए । मन्त्रालयका अनुसार काठमाडौंमा ८ र काठमाडौं बाहिर ९८ जना गरी हालसम्म देशभर १०६ जना आइसोलेसनमा छन् । यस्तै २० हजार १९५ जना क्वारेन्टाइनमा रहेको बताइएको छ ।
