बीमा समितिले पुनः थप्यो बीमाशुल्क तिर्ने म्याद

काठमाडौं, १६ असार। बीमा समितिले लकडाउनको अवधिमा तिर्न बाँकी रहेको जीवन बीमाशुल्क बुझाउने म्याद एक हप्ता थप गरेको छ । यसअघि समितिले असार १५ गतेभित्र बाँकी बीमाशुल्क तिर्ने म्याद दिएको थियो । सोमवार पहिलाको म्याद सकिएको र कोरोनाको त्रास पनि सामान्य नभएकाले पुनः म्याद थप गरिएको हो ।
नयाँ म्यादअनुसार बीमितहरूले अब आगामी असार २२ गतेसम्म विनाब्याज बीमाशुल्क तिर्न सक्ने समितिका कार्यकारी निर्देशक राजु रमण पौडेलका छन् । असार २२ गतेपछि भने तोकिएको मात्रामा ब्याज लाग्ने समितिले बताएको छ ।
सरकारले कोभिड–१९ रोकथाम तथा नियन्त्रणका लागि गत चैत ११ गतदेखि लकडाउन लागू गरेयता समितिले पटकपटक परिपत्र जारी गर्दै बीमाशुल्क तिर्ने म्याद थप गर्दै आएको छ । यद्यपि, अहिले लकडाउन खुकुलो बनाएकाले लामो समयको म्याद भने थप नगरिएको समितिको भनाइ छ ।