सम्पन्न हुँदै माथिल्लो दोर्दी ‘ए’ जलविद्युत् आयोजना, निर्माणमा ढिलाइले लागत बढ्ने

लमजुङ, १३ भदौ । लमजुङमा निर्माणाधीन २५ मेगावाट क्षमताको माथिल्लो दोर्दी ‘ए’ आयोजना सम्पन्न हुने चरणमा रहेको छ । लिबर्टी इनर्जी हाइड्रोपावरद्वारा प्रवद्र्धित उक्त आयोजनाको निर्माण ९८ प्रतिशत सम्पन्न भएको कम्पनीले बताएको छ ।
आयोजनाको अधिकांश भौतिक निर्माण सम्पन्न भइसकेको र केही प्रतिशत मात्र बाँकी रहेको आयोजनाले बताएको राससमा उल्लेख छ । हाल आयोजनाको टनेलको काम, बाढीले बगाएको सामान, स्टलेशनको काम भइरहेको कम्पनीले जानकारी दिएको छ । साविककै अवस्थामा काम अघि बढेन आगामी असोजभित्र आयोजनाको निर्माण सक्ने लक्ष्य राखिएको छ ।
२०७१ सालदेखि निर्माण शुरू गरिएको आयोजना भूकम्प, भारतीय नाकाबन्दी र गत भदौमा आएको बाढीका कारण निर्धारित समयमा निर्माण सम्पन्न हुन नसकेको आयोजनाले बताएको छ । सम्झौता अनुसार गत चैत ३० गतेसम्ममा सम्पन्न गर्नुपर्नेमा ढिलाइ भएपछि आयोजनाको लागत बढ्ने भएको छ ।
निर्माण अवधि थपिँदा लागत रू. ६७ करोड ६० लाख बढी लाग्ने अनुमान आयोजनाको छ । आयोजना निर्माणका क्रममा रू. ३ अर्ब ९६ करोड लगानीमा निर्माण सम्पन्न गर्ने लक्ष्य रहे पनि बढेर रू. ४ अर्ब ६३ करोड ६० लाख लाग्ने आयोजनाले बताएको छ । प्रतिमेगावाट लागत रू. १८ करोड ५४ लाख रहने अनुमान गरिएको आयोजनाबाट वार्षिक १३ करोड ६७ लाख ८४ हजार युनिट बिजुली उत्पादन हुने कम्पनीले जानकारी दिएको छ । आयोजनामा १२ दशमलव ५ का दुईवटा गरी २५ मेगावाटको बिजुली उत्पादन हुने भएको छ । आयोजनाको बिजुली हिउँदको समयमा आठ रुपैयाँ ४० पैसा र वर्षायाममा चार रुपैयाँ ८० पैसा हुने गरी प्रवद्र्धक कम्पनी लिवर्टी र नेपाल विद्युत् प्राधिकरणबीच विद्युत् खरिद बिक्री सम्झौता भएको छ ।