नियमित अन्तरराष्ट्रिय उडानको सम्पूर्ण तयारी पूरा, आन्तरिक उडान अझै अनिश्चित
काठमाडौं, १४ भदौ । आउने मंगलवार (भदौ १६) गतेदेखि हुने नियमित अन्तरराष्ट्रिय उडानको सम्पूर्ण तयारी पूरा भएको नेपाल नागरिक उड्डयन प्राधिकरणले बताएको छ । कोरोना महामारीका कारण ५ महिना ठप्प रहेको नियमित अन्तर्राष्ट्रिय उडान सञ्चालनका लागि संस्कृति, पर्यटन तथा नागरिक उड्ययन मन्त्रालयले बनाएको तालिका अनुसार आवश्यक सम्पूर्ण तयारी भएको प्राधिकरणले बताएको राससले उल्लेख गरेको छ ।
पर्यटन मन्त्रालयले यही भदौ १६ अर्थात् सेप्टेम्बर १ देखि ३० सम्म हुने एक महिनाको नियमित अन्तरराष्ट्रिय उडान तालिका सार्वजनिक गरिसकेको छ । एक महिनामा ६० वटा नियमित उडान र २७ वटा चार्टर्ड उडान हुनेछन् । नेपालका दुई नेपाल वायु सेवा निगम (नेपाल एयरलाइन्स) र हिमालय एयरलाइन्ससहित १० विदेशी एयरलाइन्स गरी जम्मा १२ एयरलाइन्सले अन्तरराष्ट्रिय उडान गर्ने प्राधिकरणले बताएको छ ।
प्राधिकरणका अनुसार अनुसार नियमित अन्तरराष्ट्रिय उडान हुने भए पनि आन्तरिक उडान कहिलेदेखि शुरू गर्ने भन्ने अझै अनिश्चित छ । सरकारले सहज रूपमा कोरोना परीक्षण गर्न पाउने मुलुकबाट नियमित उडान र अन्य मुलुकबाट चार्टर उडान गर्ने शर्तसहित अन्तरराष्ट्रिय उडान सुरु गर्ने निर्णय गरेको थियो ।
दैनिक ५०० यात्रु नबढ्नेगरी अन्तरराष्ट्रिय उडान हुनेछ । विश्व स्वास्थ्य संगठन (डब्लूएचओ) र अन्तरराष्ट्रिय नागरिक उड्डन संगठन (आइकाओ) मापदण्डमा रहेको स्वास्थ्य तथा जनसंख्या मन्त्रालयको समन्वयमा विमानस्थलले सुरक्षित उडान सञ्चालनका लागि स्वास्थ्य प्रोटोकल लागू गरेको छ । विमानस्थलका महाप्रवन्धक देवेन्द्र केसीका अनुसार डब्लुएचओ र आइकाओको मापदण्डमा रहेर स्वास्थ्य तथा जनसंख्या मन्त्रालयको समन्वयमा यात्रुलाई सुरक्षित बनाउन विमानस्थल सञ्चालन गर्दा अपनाउनुपर्ने सावधानीबारे आवश्यक तयारी गरिएको छ ।
नियमित अन्तरराष्ट्रिय उडान दैनिक दुईदेखि तीनवटा मात्रै हुनेछन् । चार्टर्ड उडान पनि सञ्चालन हुने भएकाले विमानस्थलले आवश्यक जनशक्ति र स्रोत साधनको प्रयोग गर्ने भएको छ । अन्तरराष्ट्रिय उडान शुरू हुने भएपछि विमानस्थल तथा वायुसेवा प्रदायक कम्पनीले कोभिड–१९ संक्रमणबाट सुरक्षित उडानका लागि स्वास्थ्य प्रोटोकल पालनालगायत सबैखाले तयारी गरिसकेका छन् ।
