सम्पन्न हुने चरणमा गौतमबुद्ध अन्तर्राष्ट्रिय विमानस्थल, हालसम्मको भौतिक प्रगति ९२ प्रतिशत

रूपन्देही, २६ भदौ । गौतमबुद्ध अन्तर्राष्ट्रिय विमानस्थलको निर्माण सम्पन्न हुने चरणमा पुगेको छ । राष्ट्रिय गौरवको आयोजनाको रूपमा रहेको उक्त विमानस्थलको ९२ प्रतिशत भौतिक प्रगति र वित्तीय प्रगति ६३ प्रतिशत रहेको छ ।
विश्वव्यापी रुपमा फैलिएको कोरोना महामारीका कारण विमानस्थलको प्राविधिक काममा ढिलाइ भए पनि अब बत्ती, उपकरण जडानलगायत केही प्राविधिक काम मात्रै बाँकी रहेको राससमा उल्लेख छ ।
आयोजनाका अनुसार अधिकांश उपकरण आइसकेको भए पनि अन्तर्राष्ट्रिय उडान सहज नभएकाले विदेशबाट जनशक्ति ल्याउन चुनौती भइरहेको छ । विमानस्थलको टर्मिनल भवनभित्र उपकरण जडानको काम बाँकी छ । ब्यागेज ह्याण्डलिङ, यात्रु सुरक्षा परीक्षण मेशिन, एसीलगायत उपकरण जडानको प्रक्रियामा बताइएको छ ।
विमानस्थल सन् २०२१ को शुरूआतदेखि मात्रै सञ्चालनमा आउने नियामक नेपाल नागरिक उड्डयन प्राधिकरणले जानकारी दिएको छ । सन् २०१७ डिसेम्बरभित्र निर्माण सक्नेगरी सन् २०१५ को शुरूमा थालनी भएको विमानस्थलको काम बीचमा ठेकेदार कम्पनीको लापरवाहीले अवरोध भएको थियो ।
पछिल्लो पटक सन् २०२० को मार्च महिनासम्मका लागि विमानस्थलको निर्माण अवधि थपिएको थियो । विमानस्थल चिनियाँ निर्माण कम्पनी नर्थवेस्ट सिभिल एभिएसन कन्स्ट्रक्सन ग्रुपले निर्माण गरिरहेको छ । एशियाली विकास बैंकको सहुलियतपूर्ण ऋणमा निर्माण भइरहेको यो आयोजनाका लागि दुवै चरणमा गरी रू. ७ अर्ब ३२ करोड हाराहारी खर्च हुने प्राधिकरणले बताएको छ ।