मेलम्ची आयोजनाको पानी पूर्ण क्षमतामा प्रवाह
काठमाडौं, ७ वैशाख । मेलम्ची आयोजनाको पानी काठमाडौं उपत्यकामा पूर्ण क्षमतामा आएको छ । आयोजनाको पानी वितरण शुरू भएको ३ सातामा वितरण प्रणालीमा दैनिक १७ करोड लिटर पानी आएको मेलम्ची खानेपानी विकास समितिले बताएको छ ।
चैत १५ गते साढे ४ करोड पानी वितरण शुरू गरिएको थियो । क्रमशः क्षमता बढाउँदै आएको समितिले सोमवारदेखि पूर्ण क्षमतामा पानी आपूर्ति गराएको हो । उपत्यकामा मेलम्ची आयोजनाको १७ करोड लिटरबाहेक आन्तरिक स्रोत तथा डीप ट्युबेलबाट दैनिक ८ करोड लिटर पानी वितरण हुँदै आएको थियो ।
पानी पथान्तरणका लागि मुख्य पूर्वाधारको निर्माण सम्पन्न भएसँगै १० गत फागुनदेखि सुरुङ परीक्षण कार्य आरम्भ गरिएको थियो । परीक्षणको क्रममा २२ फागुन २०७७ मा सुन्दरीजलमा पानी आइपुगेको थियो । चैत १३ गतेबाट सुन्दरीजलमा प्रशोधन गरी आंशिक रूपमा वितरण प्रणालीमा उपलब्ध गराइएको थियो ।
