नेप्से परिसूचक ५० अंकले बढ्यो, सबै समूहको परिसूचकमा हरियारी
काठमाडौं, १३ असोज । बुधबार नेप्से परिसूचक ५०.५८ अंकले बढेर बन्द भएको छ । यो हप्ताको सुरुवातिदेखि नै लगातार उच्च अंकले ओरालो लागेको शेयर बजार बुधबार भने १.९३ प्रतिशतले वृद्धि भएर २६६५.९३ विन्दुमा रोकिएको छ ।
आज सेन्सेटिभ इन्डेक्स पनि ८.५८ अंकले वृद्धि भएर ५०३.४६ विन्दुमा पुगेको छ ।
त्यस्तै २२९ कम्पनीको ९८ लाख ९४ हजार कित्ता शेयर ५ अर्ब २ करोड ८५ लाख रुपैयाँमा खरिद विक्री भएको छ ।
आज कारोबारमा आएका १३ समूहकै परिसूचक वृद्धि भएको छ । सर्वाधिक परिसूचक वृद्धि फाइनान्स समूहको भएको छ । यो समूहको परिसूचक ४.८७ प्रतिशतले वृद्धि भएको छ । त्यसैगरी जलविद्युत समूहको परिसूचक पनि ४.२२ प्रतिशतले वृद्धि भएको छ ।
आज सर्वाधिक मूल्यको शेयर खरिद विक्री अपि पावर कम्पनी लिमिटेडको भएको छ । उक्त कम्पनीको २२ करोड ६७ लाख रुपैयाँभन्दा बढीको शेयर खरिद विक्री भएको छ । यो कम्पनीको शेयर मूल्य पनि आज १० प्रतिशतले वृद्धि भएको छ । त्यसैगरी १० प्रतिशतले शेयर मूल्य हुनेमा ग्रिन डेभलपमेन्ट बैंक लिमिटेड रहेको छ । यो कम्पनीको शेयर मूल्य ३५ रुपैयाँले वृद्धि भएर ३८९.४० रुपैयाँ कायम भएको छ ।
