भारतीय बजेटका कार्यक्रम आर्थिक चुनौतीहरू सामना गर्न सक्षम रहेको दाबी
नयाँदिल्ली, १९ माघ । भारतीय अर्थमन्त्री निर्मला सीतारमणले लोकसभामा मंगलवार भारतको सन् २०२२—२३ को बजेट भाषण प्रस्तुत गरेकी छिन् । बजेट भाषणमार्फत अर्थमन्त्री सीतारमणले विभिन्न योजना तथा कार्यक्रमहरू सार्वजनिक गरेकी छिन् ।
बजेटमार्फत सार्वजनिक गरिएका योजना तथा कार्यक्रमहरूबाट भारतको अर्थतन्त्र बलियो हुने र आगामी २५ वर्षका लागि आधार तय हुने उनले दाबी गरेकी छिन् । अर्थमन्त्री सीतारमणले आगामी चुनौतीहरू सामना गर्न भारत सक्षम अवस्थामा रहेको पनि बजेट भाषणका क्रममा उल्लेख गरिन् ।
भारतले सार्वजनिक लगानी बढाउदै आधुनिक भौतिक संरचनाहरू निर्माणका लागि कार्यक्रमहरू केन्द्रित गरेको उनको भनाइ थियो । आगामी वर्षका लागि बजेटको अर्को मुख्य प्राथमिकताको क्षेत्र ‘प्रधानमन्त्री गति शक्ति’ कार्यक्रम रहेको पनि उनले जानकारी दिइन् ।
गति शक्ति कार्यक्रम अन्तर्गत सडक, रेलमार्ग, विमानस्थल, बन्दरगाह, ढुवानी मार्ग, जलमार्ग लगायतको विकास, निर्माण र स्तरोन्नति गर्ने योजनाहरू समावेश गरिएको छ । भारतको संघीय सरकारको मन्त्रिपरिषद्ले मंगलबार नै बजेट प्रस्ताव पारित गर्दै संघीय संसद्मा पेश गर्ने निर्णय गरेको थियो ।
