८.६ प्रतिशतले खुम्चियो बैंक तथा वित्तीय संस्थामा रहेको निक्षेप वृद्धि
काठमाडौं, २९ वैशाख । चालू आर्थिक वर्षको ९ महिनामा बैंक तथा वित्तीय संस्थाहरूमा रहेको निक्षेपको वृद्धिदर ८.६ प्रतिशतले घटेको छ । नेपाल राष्ट्र बैंकका अनुसार चैत मसान्तसम्ममा यस्ता संस्थामा रहेको निक्षेपको वृद्धिदर निक्षेप ५.१ प्रतिशतले मात्र बढेको छ । गतवर्षको सोही अवधिमा यस्तो निक्षेप १३.७ प्रतिशतले बढेको थियो ।
केन्द्रीय बैंकका अनुसार वार्षिक बिन्दुगत आधारमा चैत मसान्तसम्ममा बैंक तथा वित्तीय संस्थाहरूमा रहेको निक्षेप १२.२ प्रतिशतले बढेको छ ।
सो अवधिमा बैंक तथा वित्तीय संस्थाहरूको कुल निक्षेपमा चल्ती, बचत र मुद्दतीको अंश क्रमशः ८.७ प्रतिशत, २८.७ प्रतिशत र ५६.१ प्रतिशत रहेको छ । गतवर्षको सोही अवधिमा यस्तो अंश क्रमशः ८.५ प्रतिशत, ३५.१ प्रतिशत र ४८.२ प्रतिशत रहेको थियो ।
चैत मसान्तमा बैंक तथा वित्तीय संस्थाहरुको कुल निक्षेपमा संस्थागत निक्षेपको अंश ३८.६ प्रतिशत रहेको छ । २०७७ चैत मसान्तमा यस्तो निक्षेपको अंश ४१.७ प्रतिशत रहेको थियो ।
