निगमको पहिलो वाइडबडी असार १४ गते आउँदै, तत्काललाई दुबई उडाइने
काठमाडौं, १८ जेठ । नेपाल वायु सेवा निगमले खरिद गर्न लागेका दुई मध्ये पहिलो वाइडबडी जहाज असार १४ गते त्रिभुवन अन्तर्राष्ट्रिय विमानस्थलमा अवतरण गर्न लागेको छ । निगमले उक्त वाइडबडी दक्षिण कोरियाको सिओल र जापानको ओशाका उडाउने तयारी गरिरहेको भएपनि तत्काल अवतरणका लागि अनुमति प्राप्त नभएकाले तत्कालका लागि संयुक्त अरब इमिरेट्सको दुबई उडाउने तयारी गरिरहेको छ ।
विमानस्थलका महाप्रबन्धक राजकुमार क्षेत्रीका अनुसार, निगमको जहाजले सुरुमा दुबईबाट उडान गर्नको लागि त्रिभुवन विमानस्थलसँग स्लट मागेको छ । निगमले वाइडबडी जहाजमार्फत् दक्षिण कोरियाको सोल र जापानको ओसाकामा उडान भर्नको लागि प्रक्रिया अगाडि बढाएको भए पनि अनुमति पाउन सकेको छैन । निगमका प्रवक्ता रवीन्द्र श्रेष्ठका अनुसार, निगमले पहिलो चरणमा उक्त दुई गन्तव्यमा उडान गर्नको लागि सम्बन्धित मुलुकसँग अनुमति लिन प्रक्रिया केही ढिलाइ भएकाले दुबई उडान गर्न लागिएको हो । कोरिया र जापान तथा साउदी अरब नै उडान गर्ने निगमको लक्ष्य भए पनि केही ढिलाइ हुने देखिएकोले दुबईबाट उडान सुरु गर्न लागेको प्रवक्ता श्रेष्ठले बताए । निगमले हाल पनि दुबईमा एयरबस ३२०–२०० सिरिजको न्यारोवडी जहाजमार्फत् दैनिक एक उडान गर्दै आएको छ । दुबईमा हाल १ लाखभन्दा बढी नेपाली कामदारहरू रहेको अनुमान रहेको छ । दक्षिण कोरियामा कामदार भिषामा गएका झन्डै ४० हजार नेपालीहरू रहेका छन् । त्यस्तैगरी शैक्षिक भिषामा पनि वार्षिक १ हजारका दरले दक्षिण कोरिया जाने गरेका छन् भने व्यावसायिक भिषामा कोरिया जाने पनि सयौंको संख्यामा हुने गरेका छन् । जापानमा हाल ८० हजारभन्दा बढी विद्यार्थी भिषामा नेपालीहरू गएका छन् । त्यस्तै बाह्य मुलुकबाट जापानमा अध्ययनका लागि जानेहरुमा नेपालीहरु तश्रो ठूलो संख्यामा पर्छन् । जापानी पर्यटकहरु पनि ट्रान्जिट प्रयोग गरेर भन्दा सीधा उडानमा कुनै देशमा भ्रमण गर्न आकर्षित हुन्छन् । नेपालबाट सिधा उडान हुन सकेमा विशेषगरी नेपालीहरू लाभाविन्त हुनेछन् भने जापानी पर्यटकसमेत बढ्ने अपेक्षा गरिएको छ । निगमले हाल तीन वटा जहाजमार्फत् ९ वटा गन्तव्यमा उडान भर्दै आएको छ । निगमसँग हाल एयरबस ३२०–२०० सिरिजका दुई थान जहाज छन् भने एक थान बोइङ ७५७ जहाजमार्फत् उडान भर्दै आएको छ ।
अकुपेन्सी अहिलेसम्मकै उच्च निगमले पछिल्लो तीन महिनामा ५४ हजार ३ सय ३७ अन्तर्राष्ट्रिय हवाई यात्रुलाई सेवा दिएको छ । पछिल्लो तीन महिना अकुपेन्सी उच्च रहेको निगमले जनाएको छ । निगमका प्रबन्ध निर्देशक सुगतरत्न कंसाकारले वैशाखमा ८५ दशमलव ५४ प्रतिशत अकुपेन्सी रहेको बताए । उनका अनुसार फागुनमा ७७। दशमलव ४७ र चैत महिनामा ८४ दशमलव ५६ प्रतिशत अकुपेन्सी रहेको छ ।
