एक वर्षमा २२ अर्ब ३७ करोडभन्दा बढीको आईपीओ निष्कासन अनुमति, दुई तिहाई कम्पनी जलविद्युतका

काठमाडौं, ४ साउन । गत आर्थिक वर्ष २०७९÷८० मा २२ अर्ब ३७ करोड रुपैयाँभन्दा बढीको आईपीओ निष्कासनका लागि अनुमति प्रदान गरिएको छ । नियामक निकाय नेपाल धितोपत्र बोर्डको तथ्यांक अनुसार गत आर्थिक वर्षमा ४२ ओटा कम्पनीले आईपीओ निष्कासनको अनुमति पाएका छन् । उक्त संख्याका कम्पनीले कुल रू. २२ अर्ब ३७ करोड ८६ लाख १२ हजार बराबरको १३ करोड ५२ लाख ३८ हजार ९९४ कित्ता आईपीओ जारी गर्न अनुमति पाएका हुन् ।

आईपीओ निष्कासनका लागि अनुमति पाउने दुई तिहाई कम्पनी जलविद्युत्का रहेका छन् । सो वर्ष जलविद्युत्का मात्रै २९ कम्पनीले आईपीओ निष्कासनको अनुमति पाएका छन् । दोस्रोमा चारओटा कम्पनी बीमा कम्पनीले आईपीओ जारी गर्ने अनुमति पाएका छन् । आईपीओ निष्कासनका लागि अनुमति पाएका अधिकांश कम्पनीले जारी गरिसकेका छन् भने केहीको आईपीओ आउने क्रममा छ ।