भारतले कर बढाएपछि प्याजको मूल्य २८ देखि साढे ४१ प्रतिशतसम्म बढ्यो

काठमाडौं, ४ भदौ । भारतको वित्त मन्त्रालयले प्याजको निर्यातमा ४० प्रतिशत कर लगाएसँगै नेपाली बजारमा प्याजको मूल्य ४१.४६ प्रतिशतसम्म वृद्धि भएको छ ।नेपालमा आइतबारको तुलनामा सोमबार भारतीय सुकेको प्याजको मूल्यमा २७.८७ प्रतिशतले वृद्धि भएको हो ।

शनिबार भएको उक्त निर्णयपश्चात् पनि आइतबार नेपालमा प्याजको मूल्य स्थिर नै थियो । शनिबार प्रतिकेजी ६१ रुपैयाँ रहेको सुकेको भारतीय प्याज आइतबार पनि सोही मूल्यमा बिक्री भएको थियो । आज (सोमबार) कालिमाटी तरकारी तथा फलफूल बजारमा प्याजको मूल्य प्र्रतिकेजी ७८ रुपैयाँ रहेको छ ।

त्यस्तै, हरियो प्याजको मूल्यमा ४१.४६ प्रतिशतको वृद्धि भएको छ । भारतले निर्यातमा कर लगाउनुअघि गत शनिबारको तुलनामा आइतबार हरियो प्याजको मूल्य घटेको थियो । प्रतिकेजी १४० रुपैयाँ शनिबार बिक्री भएको उक्त प्याज आइतबार प्रतिकेजी १३६ रुपैयाँ मूल्यमा थियो । सोमबार भने हरियो प्याजको मूल्यमा उच्च वृद्धि देखिएको छ । सोमबार हरियो प्याज प्रतिकेजी १९३.३३ रुपैयाँ पुगेको छ ।